[معلومات العضو ظافر الأمير]

يا بدر باوصيك وانت أغلى غلا
ولحاجتك يا كم بذلت المستحيل

نصيحتي لا تامن الدنيا ولا
تفرح بها لوهي سقتك السلسبيل

خل التواضع منهجك والمنهلا
الكبر وانا ابوك ما يرفع ذليل

انا اشهد ان زود النفوس اكبر بلا
والغبن ثم الغبن نكران الجميل

والطير تاليه الثراء مهما علا
والوقت مهما يستوي لازم يميل

والمال كثره كالهشيم من الفلا
لا صار راعي المال في ماله بخيل

والفقر يتعب صاحبه لو هو سلا
لكن ما هو عيب واعطيك الدليل

يا كم فقير لواجبه ما هملا
يحفظ حقوق الجار ويزبن دخيل

ومجْلِسه مدهال الضيوف ولا خلا
يكرم بماجوده ولو شي قليل

باسوق لك حكمه على روس الملا
واقول لك معها عسى عمرك طويل

الحاجه الي دونها اكفوف ابخلا
الله لا يحوجنا لمدات البخيل

تقبلوا تحياتي محبكم ابو بدر