يا تاج راسي يا معلمني الطيب=يا عزوتي يا هيبتي يا غناتي
علمتني يا بوي كيف المواجيب=وعلمتني كيف الخشوع ابصلاتي
وإن الزمن كله ظروف اوتجاريب=وإن القناعه كنز ماله فناتي
وعلمتني إن الذيب ما ياكل الذيب=وعلمتني ما اسمع لهرج الوشاتي
وإني لزوم ارضى بكل المكاتيب=وما قدر المولى على العبد ياتي
وعلمتني ما اقول للمخطي امصيب=والوصل خير امن الجفا والشتاتي
والضيف له قدر اوحفاوه وترحيب=وإن الوفى يبقى سمه من سماتي*
وعلمتني ماكن خلف المحاديب=غير المحبه والغلا والصَّفَاتي ( ا )صفاء النية
وعلمتني ميراد صافي المشاريب=واترك عيوب الناس وافطن لذاتي
واجنب ادروبٍ بها الشك والريب=وصدقي وتقوى الله فيها نجاتي
علمتني تقدير كل المناصيب=والصد عن خوة خبيث الصفاتي
ورجلٍ بلا ربعٍ جروحه معاطيب=الربع عزوه ساعة المكرباتي
ومن عاش ما ياخذ ويعطي مطاليب=وش هي حياته خير منها المماتي
ومن لا رقى ساقه صغار المراقيب=تصعب عليه الشمخ النايفاتي
ومن لا يلبي لا لفته المناديب=في مذهب الغالين شين السواتي
ومن لا يودي بين لجواد ويجيب=وقت الشدايد ما بيلقى نجاتي
ولا كل صاحب معرفه رايه امصيب=وإن العزيمه تصنع المعجزاتي
كم قلت بان الصقر لولا المخاليب=ما صاد صيده مع سباع الفلاتي
فهمت قولك عيب قلة لدب عيب =وانا صغير السن باول حياتي
وشبيت وانت تزيد نصحٍ وتهذيب=وتقول لا وصيتك اسمع وصاتي
واليوم يابويه غزى راسي الشيب=ولا انسى جميلك لين تعلن وفاتي
ويا بوي مالي في حياتي مطاليب=رضاك عني غايتي وامنياتي
اسال منهو يعلم الجهر والغيب=يجزاك بالجنات خير الجزاتي