[معلومات العضو ناقد بصير]

صغير بن وحير المسعري الدوسري رحمه الله (توفي عام 1398 هـ) من ساكني مدينة الخبر بالمنطقة الشرقية وأصوله من قرية القويز (حي من أحياء مدينة النويعمة حاليا) في وادي الدواسر قال قصيدة عندما تاه في الصحراء وهو عائد من غزو نجران مع جماعة الخوالد من أهل عنك وخلطهم من بعض القبايل وكان أمير الركب حربي بن عقل الخالدي رحمه الله. ونظرا لأن القوم جواعى لقلة الزاد عندهم استأذن صغير بن وحير من ابن عقل والجماعة للذهاب لاصطياد بعض الغزلان وكان الوقت صباحا وأخذ منهم الوعد ان يجيه أحد منهم اذا صاد الصيد وسمعوا طلقات البندق وان ما سمعوه حدد لهم مكان بين يجيهم فيه وهم سايرين في طريقهم. وذهب للصيد واصطاد غزالا وأطلق النار عدة مرات لعلهم يسمعونه فلم يأته أحد فشال الصيد على رقبته ومشى للوعد ولكن لم يجد فيه أحد. فأخذ يمشي في الصحراء الحارة تحت الشمس اللاهبة لا يدري أين اتجه القوم فتاه ونفد ما عنده من ماء وأوشك على الهلاك وسقط على الأرض وحبا حتى تعب ثم أغمي عليه. وهناك في الركب يوم جاء عقب الظهر وهم في المكان الذي تواعدوا عليه مع صغير تباطوه وأمرهم أميرهم ابن عقل ان يرتحلوا فقام حزام الشرافي وطلب من ابن عقل ومن باقي القوم ان يبقوا في مكان الوعد وان يذهب معه أحد يدورون على خويهم وينقذونه وزهمهم وشنع عليهم ولكن أميرهم رفض وقال ان صغير تاه ولا نعرف مكانه والماء قليل والزاد قليل وان قعدنا هلكنا جميعا. فارتحلوا الا حزام الشرافي ومعه فالح العازمي رجعوا يدورون خويهم ولقوه مع المغرب وهو في غاية الإجهاد والعطش وعلى وشك الهلاك وأنقذوه بإذن الله وترافقوا جهة الوادي. وعندها قال صغير بن وحير هذه القصيدة وتسمعونها بصوته رحمه الله في هذا التسجيل :_


قصيدة صغير بن وحير المسعري الدوسري

طردت صيد ونا في لاهب الكنه = والقوم راحو عليهن صمل الشيب
جيت الوعد خالين والهجن خلنه = ركبو عليهن وقفو بالمشاريب
تكفون ألاد العميري هيدوهنه = خويكم يا عشاشيق الرعابيب
في خرب انا طايح واجاذب الونه = هذي سوات التغرب مع لجانيب
لو ان ربعي عليهن ما تعدنه = عاداتهم بالوعد ذب المراقيب
العازمي فالح يا سايلن منه = علمه جميل وشرعه يكسب الطيب
وحزام ذاك ابن عمي ما بها منه = هذي سوات الحمايا يا معاطيب
جوني على ضمر والدشن يزهنه = يا والله أومو عليهن بالمشاعيب
مع طلعة الشمس وادي السيح وردنه = ذارن من الضول زينات المراكيب
يا بد ما يقبلن والعلم جابنه = علم ثبات وهرج بالمشاذيب
كم عبلة زامية هجني توطنه = بالقيظ وحدي ولا أدل المواهيب
عديت كل الموارد قربتي شنه = متغانم قبل يبدا راسي الشيب
عزي لبوخالد لامنهن جنه = ما شافني يالنشامى مع هل النيبي
دنق عيونه لحر الدمع صبنه = ثم انصفق عايف لعب اللواعيب
جيته على الفاطر اللي وصفها كنه = لا هيب دنه ولا فيها شواذيب
يفداتس يا فاطري من حطت الخنه =من غير جوز تحطه للصاحيب
يفداتس خمع ربوعه قد شكو منه = له موقف خايب عند المعازيب