قصيده تحكي عن نفسها....للشاعر بدر بن عواد الحويفي....يقول:
ياناس بالعادات شفنا الغياره"=" رخص الشرف والطيش دقت طبوله
بعض شباب اليوم ضيع وقاره"="خاص الذي درب المعاصي ميوله
مايفهم اللي ينفعه من دماره"=" ولايحترم دينه وملة رسوله
يعوم طول الليل في كل حاره"="مابه شرف دنيا ولابه رجوله
يفرض على نفسه اسلوب الحقاره"=" ومن شان فعله مانفع زين زوله
على الخنا يسهر ويرقد نهاره"="وأمه وأبوه مضيقتهم فعوله
عقله ضعيف ويدعي بالشطاره"="وله شلة لامرهم صفقوا له
من بينهم معروف رمز الاشاره"="وان طافهم ماشافهم صفروا له
سلك التفاهم بينهم والعباره"="ألفاظ تنفاها النفوس الخجوله
قالو تعال وكلهم بانتظاره"=" نبي لنا مع هجعه الناس جوله
خسارة ياكبرها من خساره"=" ليا عود البالغ لعقل الطفوله
واستثني اللي نهج الاخيار كاره"=" المستقيم اللي نزيهه اسبوله
اللي مع الطرق السليمه مساره"=" حافظ مبادي سمعته والحموله
العقل والدين الحنيفي شعاره"=" وجيران بيته بالصلاة اشهدوا له
وسلامتكم...