ياشاعر المعنى ترى المعنى على بطن وظهر= والظاهر انك مانت عارف من ابوها وامها
حاول بها عل وعسى يمكن بعد عندك نظر= وان كان لك عقل ذكي حدد هدفها وارمها
ولا تريح واسترح لاتدعي صبح وعصر=انك تعرف اجدودها من خالها لاعمها
يمكن تعرف الفرق مابين الدجاجه والصقر=وان جبتها قلت الله الله يالمحنك تمها
للناس غايه وانت غاياتك مع العالم عشر=وتقول عارف والمعرفه مانت والله يمها
يافيلسوف العصر يالعقاد ياشوقي مصر=يافلتة العصر الحديث اللي العلوم تضمها
ادري انك من زود الكبر ماتاسعك دنيا البشر=تمشي تبختر وانت رايح يالظعيف بكمها
معميك حبك للولائم والمظاهر والفخر=تستصغر الناس العزيزه كلها وتعمها
لاتحسب الناس اغبيا ماعندها سمع وبصر=تعرف علومك كلها لاشك مانت اتهمها
للشعر ناس تبدع المعنى وتقدح من صخر=من مرهف احساس المشاعر تكتبه من دمها
شعار وتعرف المبادي مايعيبها الفقر=ماتتبع ارياح المصالح لجل تملا فمها
اكبرمصيبه للشعر واكبر خطا مايغتفر=مثلك يجي في ساحة الشعر النقي ويسمها
جاك الخبر واخذ الخبر وان كان ماعندك خبر=قدام تغريك الرديه واختها وتخمها
هرج الردى جهد الردي طال الزمن ولاقصر=ماطال به راعيه والعيبه على من زمها
هذي سنه خامس سنه مرت شهر ورى شهر=اتجاهل اعلومك وقول بتنتبه وتلمها
معك التزمت الصمت والصابر قضى منه الصبر=ان ماكفتك الاوله ذقها والاخرى شمها
الكلب لامنه نبح لقمته اتراب وحجر=قلت الخلا ثم الخلا لو الاذاني صمها
وصلت مواصيل الخطر معاد باقي لك عذر=كلمه وجاتك سمها زي ماتبيها سمها
برق بنفسك واستتر يامال قصاف العمر=قدام لاتمدح رجال المعرفه وتذمها
اسمع نصيحة عاقل رتب كلامه واختصر= عطاك مضمون الرساله رسمهامن وسمها
بغير الموضوع والفكره على الخط الحمر=و اوجه الدعوى لمن يارد زلايل جمها
شاعر علم من نوع فايف استار لامنه حضر=غطى على كل النجوم المرقبه ويغمها
امبارك بن محمد ابن غياث والعزوه ظفر=الشاعر اللي سابح تسع البحور وطمها
موهوب وهبه والمواهب من كريم لاومر=يعطي عباده مايشاء واناس يعلم علمها
نعم نعم قول وفعل خلق وأدب شاعر بحر=نجم سطى حين ابتدا ثم اعتلا في قمها
ابيه يحكم في القضيه مانبي زيد وعمر=قدام لاتكبر ويظهر للعواذل نجمها
راضي بحكمه لوبعد حكمه على نفسي صدر=راضي بحكمه والعوارف راضي في حكمها
افطن لها ياقاضي العراف في سطر وسطر=وانشد عن اللي ميّع الزبده وقام ايحمها
واقبل تحية صاحب الدعوى ويهديك الشكر=ياقاري الفنجال عندك علم ابوها وامها