أنا ماهقيـت يسـوّي الوقـت مـا سـوّاه=وخان الزمـان وعـادة الوقـت خوّانـي
ويا حـيّ مـن هـذي ديـاره وذا مربـاه=ذواري هبوب النـود مـن فوقهـا بانـي
أنـا يـوم شفـت البيـت متهـدم ٍ مبنـاه=تذكّرت زول ٍ كان فـي البيـت سكّانـي
أنادي عليه وساقي العيـن جـاري ٍ مـاه=وأنا عارف إنـي لـو تحرّيـت ماجانـي
ظلمني الزمان اللي جبرني علـى فرقـاه=صواديـف بقعـا شرّهـا مـا تعـدّانـي
صدوف الزمان وطول صبر ٍ لحقت اقصاه=حدتنـي علـى مبـدا الطويلـة مسيّانـي
أنا قد بغيت أوقـف الرجـل مـن مبـداه=ولكـن شفـت المـوت مازيـد خلانـي
إلى جيت عد ٍ قـد نـزل مـاه والا جـاه=تسابق دموعي واظهرت خافـي أحزانـي
أنا كيف ابدله واطمع ان خاطـري ينسـاه=وأنا كـل مـا مريـت مدهالـه ابكانـي
إلى جات به الاخبـار وألاّ حـد ٍ طـرّاه=ما عاد أتسمّع صوت مـن زيـد حاكانـي
أعيـش بخيالـه واتنـادم مـع ذكــراه=ويدوي بي الهاجوس فـي عالـم ٍ ثانـي
يغيّم سمـاي إلـى تواجهـت أنـا ويّـاه=وحتى الحكي ماعاد ينطـق بـه لسانـي
قضى العمر كله عادني في رجـا لامـاه=وطـال الرجـا واليـاس قـام يتحدانـي
هو اللي تتوق النفـس لمشاهـده وحكـاه=ولا جـا بقلبـي عنْـه سجّـه ونسيانـي
لـ الشاعر / عامر بن نوطان المري - رحمه الله -