يالايمـي ياعـل مالـك عـراوي=بـلاه ماولّعـك بالحـب حلـيـاه
من لا يعرف الحب عنده دعـاوي=يشره على راعي المحبة ويشنـاه
ويقول هذا في مماشيـه غـاوي=وحنّـا نـدلّ الـدرب والحمـد لله
يالله عسى مثله كثيـر الهـزاوي=يبلا ببلوى مـن لسانـه تهـزاه
حتى يعـرف إن المحبـة بـلاوي=ويشوف مثل اللي من الحب شفناه
عساه يبلى فـي محبـة حيـاوي=حب الهنوف اللي يحده على أقصاه
تفرى ضميره فري دلو الـرواوي=إلى صفقها الجال من حـد ملقـاه
لا لجلجت له بالنظيـر السهـاوي=كلامها(لبيـه) عـن قولـةٍ هـاه
كلامهـا للقلـب مثـل المـداوي=اللي عرف علـة مريضـه وداواه
الأخ العزيز الغالي النايف
لاشلت يمناك يالقرم على ماخطت لنا
إختيار موفق للغايه وجميل وجزل
وعزالله العزيز إنك تخيرت يوم أخترت
رحم الله الشاعر مرشد البذال برحمته وعفا عنه
فقد كان نبراساً للشعر ومنهل لمن أراد التعلم
بيض الله وجهك يالنايف ولاتخلينا من مثل هذه المشاركات
عاطر التحايا
محب الجميع : دغش البطي