[معلومات العضو عبدالله الدوسري]

خلّ الجريح اللي يلملم جراحه=لا تزيد في بلواه ما انته بمجبور
توّي عرفت الوقت ما فيه راحه=و من يشتكي للنّاس ما هو بمعذور
كنت احسب ان قلبك يعرف السمّاحه=يدرا خويّه لو وقع له بمحذور
بدّلت ساعات الفرح لي مناحه=و بيّحت بي سدٍّ عن النّاس مستور
لا وا هني الطّير شلّه جناحه=و انا طريح وساد ما افارق الدّور
لدّ النّظر في اللّي عشانك مطاحه=لا تتبع اللي طبعه يلفّ و يدور
ياليت من يقدر يجي لك سباحه=يدخل عليك و يهدم الباب و السّور
الكلب ينبح ما علي من نباحه=و الذّيب ما يرضى لمن وصْلَت الزّور
ما ابي يجي بيني و بينك مساحه=ابْيَ اتخالط معْك باحساس و شعور
شوفتك تلغي كل طبّ و جراحه=و مفارقك يقطع عن عيوني النّور