أبتدي بسم الله العالي الحي السميع=عالمن سر الليالي مدير أحوالها
يالله إنك تنصر الدين وتعز الجميع=والملك عبدالله إلي يقود أبطالها
صيرمياً يرفع الراس والمجنى رفيع=من عمام ومن خوالاً عزيزاً جالها
فيصلياً لاعتزى كلمة اخصامه تضيع=أشهد انها تعتبر كلمته لاقالها
مثل يوم أحداث غزة تشيب بالرضيع=من صواريخٍ تدك النساء وأطفالها
قال له كلمه إلى جاة من مثله شجيع=هزة أقطار الدول واحداثة زلزالها
بالسياسة والفراسة يسكر كل ريع=والبلاد آمن ويأمن بها اللي حالها
وسمحولي ياهل العرف والذوق الرفيع=باتخير فالقصايد واجيب إجزالها
القصايد باشتري في نواديها وابيع=وآخذ الجزلات منها واكب هزالها
القصايد راسلتني على الرد السريع=وطبت الميدان والخيل من خيالها
شاعراً واقدح من الراس من بالاً وسيع=مانشاور زيد وعبيد في عدالها
سجلوها في الصحافة وذعها يالمذيع=وانشروها بالقناوات عبر إرسالها
مرحباً عند العجالين واهلاً بالجميع=في محل شيوخنا إللي لنا وأنا لها
عند ربعاً من الأوايل يعشون الجويع=ويحتمون الدار لامن انتخت برجالها
يومها بالرمح والسيف والظرب الشنيع=والعرب تعرف وتذكر بطيب أفعالها
معجب وحزام كانوا لها سوراً منيع=وهم هل الديرة وهم شمسها وظلالها
والوداعة دايمن مايظيعها الوديع=واليسود تخلف العز بين أشبالها
وكلمتاً بأقولها يانشاما لاتضيع=اختلاف الراي بين الرجال أردالها
ولتحام الصف يبقى كما السد المنيع=لويبي يحتال فيها العدو محتالها
الله اكبر يازمان العجايب والتبيع=والثعالب فيه قامت تهز أذيالها
والمنافق صار بالمجتمع شانه رفيع=والعرب ما تأخذ الراي من عقالها
والشباب يقلد الغرب والمنظر فضيع=وشلة التقليد في حالةٍ يرثالها
والله العالم وحلمه على خلقه وسيع=يمهل عباده ويحصي جميع أعمالها
والله الهادي وصلوا على طه الشفيع=عد ماهل المطر من صدوق أخيالها
والسلام اختام والله يحفظكم جميع=ويصلح أحوال العرب من جميع أحوالها