إن صار زود المال بيديـن الانـذال
حنّا مـن المعـروف تنـدا يدينـا
وان كانهم شرهوا على طيب الافعال
حنّـا وردنـا جمامهـا وارتوينـا
وان فكّروا للجود يمشـون رحّـال
حنّا قبـل يمشـون يّمـه خطينـا
يا ما لبسنا للشـرف كـل سربـال
وعلى البسيطة للفضيلـة مشينـا
في دوحة العربا لنا مجـد وظـلال
وحنّـا علـى در المكـارم غذينـا
لو نجمع اللي فات منا مـن المـال
إن كان شيدنـا القصـور وبنينـا
نعطي ولا نتبـع عطانـا بالاقـوال
ونبذل ونسكت كننـا مـا عطينـا
وان باعوا الشيمة بدينـار وريـال
حنـا دخلنـا سوقهـا واشترينـا
نطلع لها لو هي على روس الاقذال
لو هو عسير ٍ دربهـا مـا انثنينـا
بافعالنـا نرسـم دروب ٍ للاجيـال
إللي نساهـا غيرنـا مـا نسينـا
أسود سـادات ٍ تسجـل للاشبـال
فضايـل ٍ شمنـا لهـا واهتديـنـا
بيض ٍ نسجلهن جديـدات وسمـال
حفايـظ ٍ لاحفـادنـا اللاحقيـنـا
نصبر على الشّدات لو شيلنا مـال
لو سـال دم دفوفنـا مـا شكينـا
نخـاف يلقـى سدنـا كـل ختّـال
ويبني هزيـلات المعانـي علينـا
الليل يا خالد علـى والـدك طـال
وهنّيـت نـاس ٍ بالكـرا نايمينـا
يا عز راسي شفت ما خبث البـال
شـي ٍ يهـوّل شيّـب الجاهليـنـا
شي ٍ من اسبابه يشيـب بالاطفـال
فطّر خشـوم مهجرعـات الحنينـا
أدير قـالات ٍ عريضـات وطـوال
قـالات خلـنّ المخـفـىّ يبيـنـا
منهن رزين العقل بالوقـت يهتـال
بوقت ٍ عبـوس ٍ فطّـن الغافلينـا
وقت ٍ من اسبابه شكى كل ريبـال
نصبـر ونسكـت كننـا غايبينـا
النـاس بالأيـام راحـل ونّــزال
وتفجعهـم الدنيـا وهـم دالهينـا
وحيات رب ٍ نـزل آيـات الانفـال
عالـم خفايـا نـيـة الحاقديـنـا
ما اترك طريق العدل في كل الاحوال
لـو يرحـل المريـخ للفرقديـنـا