[معلومات العضو ابو زيد الغييثي]

قصيدة الخلوج الشهيره للعوني

خلوج تجذ القلب باتلى عوالها =تكسر بعبرات ٍ تحطم سلالها
تهيض مفجوع الضمير بحسها =الى طوحت حسه تزايد هجالها
له قلت أنا يا ناق كفى عن البكا=لا تبحثين النفس عما جرى لها
لا تفجعين البال بالله هودّى =ولى خلوج ٍخبث البين بالها
تبكين فرقا بكرة ٍشدة العرب =ضاعت يمين البوش والا شمالها
تجيك يا ناق الخطا أو تجينها =وان كان ضاعت لك بديل بدالها
لكن أنا اليوم ما تنعد مصاوبى =ولا علتي تبرا ولا ينشكى لها
فلو البكا يا ناق عنى يحلها =بكيت بيض أيامها مع ليالها
ولو البكا يا ناق يرجع لغايب =بكيت لين العين ييبس ثمالها
وابكى على الا ثنين ما ذعذع الهوا =مدى الدهر لين النفس تلحق زوالها
وابكى على ما صاب نفسى وما جرى =وابكى على فتخان الايدي زلالها
وابكى على دار ربينا بربعها =معلوم خشم الرعن من شمالها
ومن شرق طعسين الأرخم تحدها =بين اللوى والسر ما اطيب سهالها
دار بنجد جنة كان قبل ذا =ومن صكته غبر الليلى عنا لها
وصفه من الخفرات بيضا عفيفه =يفوق كل البيض باهر جما لها
حسودها يغضى الى مر حولها =من خوف عيال تربوا بجالها
حى امنا واحلو مطعوم درها =غدتنا وربتنا وحنا عيالها
بزور بنا ما مثلها يكرم الضنا =وصول بنا لكن نسينا وصالها
تلقى علينا الجوخ والشال فوقنا=وهي عاريه تبكى ولا احد بكى لها
ولا أحد جزع من صيحته يوم سبلت =ولا أحد نشد من بعد ذواش جرى لها
قلت آه واويلاه يا خيبة الرجا =كيف أمنا تهضم وحنا قبالها
يا طارش من فوق سراقة الوطا =هميم الى سارت ذعرها ظلا لها
حايل ثمان اسنين ما مس خلفها =ولا بركت للشيل جملة حمالها
الى بدالي لازم قلت شدها =واضبط عن الفزات مقضب حبالها
ولا نعتنى بالخرج ماذي بحزته =شل قربة ٍ واجعل زهابك عدالها
فالى شلت خذلى بالرسن قدر ساعه= أبلغك في دق المسايل جلا لها
والى ختمته بالسلام فحثها =من دار ابو جابر سقى الغيث جالها
اوصيك يا مرسال بالسير والسرى =واحذرك نوم الليل عينك ينالها
الى سرتها عشر وخمس مغرب =مرواحك الشام منها منا لها
والى جيت سوق العصر ياتيك غلمه =تخثع بزينات البريسم انعالها
يقولون لك ياصاح عطنا علومك =بلدان نجد ٍعقبنا وش جرى لها؟؟
قل كل بلدان القصيم وغيرها =عن الخوف زاموا دون جاله رجالها
مير داركم من عقبكم تندب الثرى =تبكى على الماضين واعزتا لها
ترى مركب الاخطار هو مصعد العلى =ولا يدرك المقصود غير احتمالها
وترى بالسيوف المال والعز والبقا =والجنه الخضرا بخضرة ظلالها
قومو براى الله واقضوا ديونكم =أنتم هل القالات ما أنتم رذالها
مدام ابو جابر على العز والبقا =عنا ثقيلات الحمول ارتكى لها
الى احترك سبع القبايل تحركت =والى رسى ترسي رواسي جبالها
قوموا برايه ثم راي ابو ثامر =ابو كلمة يافي بها حين قالها
عرق الصخا بحر الندى مرهق العدا =لااشتبت الهيجا تعرفه رجالها
هيج سباع الحرب بالبر والبحر =والشمس تشكي منه عجه ينالها
ومصقلات الهند تدعي له البقا =لولاه كان اصدت بغمده سلالها
نشا مولع بالحرب والضرب ماشكا =والخيل والعيرات تشكي هزالها
من كثر مامسه على السير والسرى =من كثر ماخاضت مهامه سهالها
قوي باس مايلين الى مضى =الى ضكته صعب الحمول ارتكى لها
شال الحمول الثقيله يوم جدعت =عفى زمول جدعتها وشالها
هذا وتم القيل والله به الرجا =وصلوا على المختار مااهمل خيالها

الشاعر / دغش بن بطي رحمه الله