أخواني أعضاء منتداناالشامخ يشرفني أن أضع بين أيديكم
هذه القصيده المتواضعه وهي مساجله بيني وبين الشاعر الكبير محمد بن ناصر الغريري
في منتدى( تغلب الغلبا )وأتمنى أن تنال أعجابكم...
بيني وبينك ياقمر حلف وعهود=نقضتها وخليت حالي عسيره
متحمل منك الجفا وكثرة صدود=وشبيت في داخل خفوقي سعيره
طاوعت حظي وصرت اليوم مقرود=وجمعت لي غم وهموم كثيره
ياراعي مكحوله ياخير مقصود=يانسل قوم ذكرهم طيب سيره
ياراعي الجزلات ياراقي سنود=ياحامي ذود القصير وقصيره
قلبي ترى مني غدى وصار مفقود =وروحي تراها يامحمد كسيره
غديت أنا مابين طارد ومطرود=وكل تعزواله بعز العشيره
غديت كني على جال مجرود=بين الخناجر والسيوف الشطيره
غديت في غدرا وغدا الدرب ممدود=بين الدروب الكايده والخطيره
ليت الهوى ياصاحبي ماله وجود=ولاعرف قلبي مثيله وغيره
ذكره ترى عندي مثل بارد النود=مثل الخزامى والنفل في عبيره
شوفه مطر هتان وريحه كما العود=وقربه حيا نابت بوسط ديره
عينه كما حر على الشوف مهدود=قرناس وكره في الجبال الوعيره
يالقرم أنا أبغى منك الحين مردود=يمناك ماهي بالمراجل قصيره
شورك على ياصاحبي ماهو بمنقود=ماهي غريبه صاحبي وأستشيره
وهذا الرد..
طبع اليالي ماتجي اسهود ومهــود=والوقت ماخلا عشيروعشيره
لوكان حبل الود بالوصل مــمدود=بتجيك دورات اليالي مغيره
مدام طبع الغدر بالناس مــوجود=لالاتعجب بالزمان ومسيره
للوقت وقفات وبالناس مجحــود=ياقاري التاريخ نبــذه وسيره
هذي ضحايا الحب ماعنه منشــود =والعـاقل اللي يتعض من نذيره
لابارك خـــلٍ من الناس معــدود=خله وتلقا بعالم الحب غيره
لاخير في حب يجي منه منقــود=ولاخير في حب يجي با المعيره
مانتب ياهادي لراعي الغدر محـدود=والرابح اللي يستمع من شويره
ارفع مقامك وانت بالعز موعــود =والعـــز لرجــال مثـــل الــذخيـره
والصبر في صعب المواقف محمـود =يالله عسى في قسمة الله خيره
ونا اسنادك واصدق الهرج موكــود=سيفٍ يضيم اعداك لوهي غفيره
وختامها انسوق فايح العطر والعـود=المنــتدى تغــلب الغلباء الشــهيــره