البارحه جاوبت لي حس عاوي=ذيبٍ عوى لجيّت بالحس وياه
ذيبٍ يجر الصوت حسه خلاوي=ياقلب ياللي جاوب الذيب بعواه
والصبح بانت في ضميري أهاوي=صوتٍ زعجته ليت خلي توحاه
يا دار ما شفتي ظبيّ المطاوي=أتلى علامي به غشنك رعاياه
أنا على شوف الحبيِّب شفاوي=كانه هنيا خبريني بممساه
قالت لي الأوطان جلَّع ضحاوي=اليوم رأس الرجم هذا توطاه
أمسٍ بهذا وأصبح اليوم ناوي=يتلى سلف بدوٍ بعيدٍ معشّاه
كشف لهم برقٍ سديدٍ عشاوي=يخيّلونه يم خشم المسنّاه
يبون مرباعٍ بهاك الحراوي=لازاف زملوقه وشبعت رعاياه
إخذ الخبر ماهوب خرص وهقاوي=أعطيك علم صويحبك وين تلقاه
أدنى مرابيعه بخشم الصداوي=وبيوت مقياضه بقريه مبنّاه
مير أطلب الله لو صوابك مخاوي=كم واحدٍ قبلك عشيره تمناه
بالعين ما ينفع كثير الشكاوي=إلا على اللي دبّر الغيث وأنشاه
ياونتي ونة وحيدٍ جلاوي=اللي سبب دينه من أقرب دناياه
ولا خلافه من يحل الدعاوي=لاصار ربعه منه تبي المشاره
عليك ياللي لك بقلبي مكاوي=ثلاث ردعاتٍ هوادي وعرقاه
عقبه فقد من المنام الحلاوي=وحتى متاعي قامت الكبد تجفاه
يالايمي ياعل مالك عراوي=بلاه ماولّعك بالحب حلياه
من لا يعرف الحب عنده دعاوي=يشره على راعي المحبة ويشناه
ويقول هذا في مماشيه غاوي=وحنّا ندلّ الدرب والحمد لله
يالله عسى مثله كثير الهزاوي=يبلا ببلوى من لسانه تهزاه
حتى يعرف إن المحبة بلاوي=ويشوف مثل اللي من الحب شفناه
عساه يبلى في محبة حياوي=حب الهنوف اللي يحده على أقصاه
تفرى ضميره فري دلو الرواوي=إلى صفقها الجال من حد ملقاه
لا لجلجت له بالنظير السهاوي=كلامها(لبيه) عن قولةٍ هاه
كلامها للقلب مثل المداوي=اللي عرف علة مريضه وداواه
يارب إني بالتفاتك رجاوي=تلم شمل الولف من عقب فرقاه
لو تنفع الفزعات ولاّ النخاوي=على المحبة كان كلٍ نخيناه
مير الرجا والياس صار متساوي=ياقلبي أصبر في تدابير الإله
لو مابقى في حالك إلا شلاوي=ما دبّر الوالي على العبد يرضاه
الشاعر الكبير/ مرشد البذالي