[معلومات العضو ابو زيد الغييثي]

واهني الصخره اللي مايحرقها سمـوم=الزمان اللي يهـد العـزم مـا هدّهـا
الزمان اللـي تحـدا قوييـن العـزوم=لين مشّاهـا علـى ود ماهـو ودّهـا
والمجامل بعض الأحيان ما يقضي لزوم=لابو النفـس الضعيفـه ولابـو جدّهـا
مير تجبرنا العوايد وتجبرنـا السلـوم=نكتم الأسـرار ياليـن تاصـل حدّهـا
الردي لا طاح جعله يطيـح ولا يقـوم=باح سدّه والنشامـا مـا بـاح سدّهـا
كل ماكبرت وضاقت على عيال الرخوم=نحتزم لأكبر مصيبـه وناطـا خدّهـا
جعل قسمي عند ربي من خيار القسـوم=واحـدٍ يعطـي العطايـا ولا يرتدّهـا
ياعيال آدم وحـوّا تراهـا مـا تـدوم=دورة الأيــام لابـدّهـا لابـدّهــا
ياوليد البـط وشلـون ماتقـدر تعـوم=وانت ابوك يعوم جزر البحور ومدّهـا
وانت ياحلمٍ حلمته مهـو مثـل الحلـوم=ياضحيّة مزح الأحلام مـدري جدّهـا
ادري ان فالناس معطى وفالناس محروم=ايـه يابيـض النوايـا ويامسـودّهـا
وياضميري لا يهمك من الدنيـا همـوم=الصعيبـه حلّهـا والبسيطـه عـدّهـا
جات في سد الشوارب وفي سد الخشوم=كبّر الضيفه وعش الضيـوف وغدّهـا
والمراجـل ماتوفـى بضافيـة الهـدوم=كود بسيوفٍ يشـوق النواظـر حدّهـا
والردي لو درّس المرجله في كل يـوم=المراجل عنـد اهلهـا يذعـذع ندّهـا
يعتبر قسمه مثل قسـم زاهيـة الرقـوم=يوم تكحل رمشهـا والقـرون تكدّهـا
ماكسبت الا رضا اهل النمايم والعلـوم=يارسول الحكي هـات العلـوم وودّهـا
الصفوف اثنين هذا دفـاع وذا هجـوم=وانت اظنك لانت معها ولا انت بضدّها
شرهة الطيّب تعـداك للغـوج العـزوم=وانت صلفات المشاريه ماانـت بقدّهـا
وانت في سود الأظله تريّـح ومخـدوم=وان ذبحك الجوع كد التكاسـي كدّهـا

ابو معجب بيض الله وجهكـ على هذه الابيات

الغير مستغربه من سلطان بن وسام الهاجري

وانا بنتظار جديدكـ يالقرم

أخوكـ / ابو زيد الغييثي