[معلومات العضو عبدالله الدوسري]

كانك غلطت أرجوك كرّر عشاني=أغلط و أنا أسامِحْك في كلّ مرّه
صوتك بعد ما مات قلبي نِشاني=و أبعدت عنّي كلّ ضيقه و حرّه
إن مّا مشيت الحب قام و مِشاني=من طبعي الإخلاص ذرّه بذرّه
يا ما أعذب الإحساس منّك غشاني=منّك رضيت الكأس حلوِه و مُرّه
من مسلك الرّدْيان عزّيت شاني=ما نيب من يقضب عليك التشرّه
طبعي و فيّ، و هافيٍ من وشاني=الحرّ في عالِ المراقي مقرّه
لو بسّ نسلم من ظروفٍ خْشاني=و إلاّ فَإنّ الوقت كرّه و فرّه
قد قلتها لك قبل "اغلط عشاني"=و أنا بأسمح غلطتك كلّ مرّه