[معلومات العضو الزين]

,’,

يا ما حلا الفنجال مع سيحة البال =في مجلســ (ن) ما فيه نفسـ (ن) ثقيلة

سوولي الكيف وأرهولي من الدله=البن الأشقر يداوي الرأس فنجالـه
كيفٍ لنا نحرقـه بالنـار ونزلـه=وليا انقطع لو ورى صنعاء عنيناله

ياما حلى فنجال بيضٍ بغاديد=قبل صلاة الصبح والوقت ما فات

بدوٍ تنفّد غالي البن تنفيد= بدلال وارفافٍ طويل ظلاله

عليك ياللي طبخته نصفها هيل=اللي سعى بالطيب من غير قوه

كم مرةٍ وقيّت أنا الكف بالبيز=من دلةٍ ريح العويدي ذعرها

أحمس ثلاث يا نديمي على ساق=ريحه على جمر الغضا يفضح السوق
إياك والنية وبالك والإحراق= واصحى تسير بحمسة البن مطفوق
ليا اصفر لونه ثم بشت بالأعراق=صفراً كما الياقوت يطرب لما الموق
وعطت بريحٍ فاخرٍ فاضحٍ فاق=ريحه كما العنبر بالأنفاس منشوق

خله تفوح وراعي الكيف يشتاق= ليا طفح له جوهر صح له ذوق

ليا قلب بالهيل يالقرم كفه = وليا ركد خله على الصين يذرف

جر الفراش لنا وهات الدلالي=أربع مغاتير على النار تدنا
ترى حلاة النار دوم إشتعالي=وسوقة فناجيل عليهم من أدنا
فنجال أشقر مثل دم الغزالي= ليا نقص شيء من الكيف زدنا
أتعب لها بالسوم لو كان غالي= لو كان زود بالثمن ما نشدنا
نشري لها المثلوث هو شف بالي= لو كان سوقه نازح عن بلدنا
ياما دفعنا بالثمن من ريالي=غير القرا نسهر لهم ما رقدنا

يا ما حلا يا عبيد في وقت الاسفار=جذب الفراش وشب ضو المناره
مع دلة تجذا على واهج النار= ونجر اليا حرك تزايد عباره
النجر دق وجاوبه كل مرار = ما لفه الملفوف من دون جاره

يا فهيد صك النجر يوحيك بتال=صكه كفاك الله جميع الأذايا
استدن نجر في الدهر يعول اعوال=اعوال سبع حاديته الضرايا
وعليه كيف لي من البن فنجال=جعل الرخوم ونسلها لك فدايا

قم سو فنجال ٍ ترى البال منداش=لعيـون من قرنه على المتن مرجود
فـي دلـة ٍ مربوبـة ٍ كنها شاش=وبـهارها مقدار خمسة عشر عود
والهيل حطه لا تداني ولو جـاش=ومـن الزباد اقنع على شذرة العود

يا سليم شب الضو مالك مهانه=يجي لها ضوحٍ يقود السراتي
وأشغل بفنجال وزيّن زيانه=وإحذر من الإحراق وألا النياتي
ريح وطعم راعيه ينشع لسانه=أطرف حمر لونه كما دم شاتي

يا بجاد شب النار وادن الدلالي=وأحمس لنا يا بجاد ما يقعد الراس
ودقه بنجر يا ظريف العيالي=يجذب لنا ربع على اكوار جلاس
وزله الى منه رقد كل سالي=وخله يفوح وقنن الهيل بقياس
وصبه ومده يا كريم السبالي=يبعد همومي يوم اشمه بالانفاس
فنجال يغدي ما تصور ببالي=روابع تضرب به أخماس وأسداس

ياحسين لاكني على الجمر مجضوع=من فقد خلاني وفقدي ربوعي
قم سو فنجالٍ ترى الراس مصدوع=صفه وزله عن سريب الخموعي
فنجال فيه مخموس الكيف مجموع=بدلال يشدن الخباس الوقوعي
ونجر دلاله ماو بالصوت مفجوع=يا زين حسه والخلايق هجوعي
وانجاك بالمجلس سنافي وبالوع=عده على الطيب وكب البلوعي

قم سو فنجال ونظف أدلاله=ريحه لراعي الكيف يجلي اعماسه
اشعل ولونه مثل دم الغزاله=لاذاقه الراقد يحارب انعاسه
في مجلس تدله الى جاء مجاله=اللي عن اللجات يقصر حساسه
والا ترا بعض المجالس عذاله=لا معشر طيب ولا فيه اناسه

دنيت لي من غالي البن مالاق=بالكف صافيها عن العذق منسوق
احمس ثلاث يا نديمي على ساق=ريحه على جمر الغضى يفضح السوق
واياك والنيه وبالك والاحراق=واصحا تصير بحمسة البن مطفوق
دقه بنجر يسمعه كل مشتاق=راع الهوى يطرب الى دق بخفوق
لقم بدله مولع كنها ساق=مصبوبة مربوبة تقل غرنوق
خله تفوح وراعي الكيف يشتاق=الى طفح له جوهر صح له ذوق

الى ضاق صدري قمت لم الدلالي=شبيت ناره يوم عني الكرى غاب
الى اصرهت بالجمر عقب اشتعالي=زليت صافيها على كيف شراب
وقلبت حمستها على شف بالي=حوش الغنم لين العرق فوقها ذاب
ودقيتها من ضيقتي باعتجالي=نجره يصيح لراعي الكيف جذاب

الكيف خله عند من يشترونه=المشكلة اللي جابها من بلدها
ياحامسين الكيف لا تحرقونه=حذراء عن الشعله تغير نقدها
حتى يجيك محمر كن لونه=مجت جراده ظاهرة من جسدها
صبه على اللي ربعته يدهلونه=له ربعة من راح منها حمدها
وعده عن اللي واقف له بشوته=يمسي ويصبح عارف لك عددها
ما غير عنده طايرات عيونه=لا باع شاته جاك حزة وعدها

جهز دلالك وماك الحلو عبــــه=وحط من بن اليمن كب الهراري
واحمس اللي خل بالك يم حبه= والحذاري تحرق البن الحذاري