[معلومات العضو كلاش]

قصيده قريتها قبل سبع سنوات بدون أسم شاعرها

وأعجبتني وتعجبت كيف مايعرف شاعر هالجزله

وبعدما سألت عن شاعرها قالوا لابن جدلان الأكلبي

لذا زال أستغرابي

يقول صح لسانه..

الا يالله دخيلك لا معي بيجر ولاجوال =ولا عندي وظيفه والتجاره فاشلٍ فيها
ولا عندي شهاداتٍ ولا حرفه تسد الحال=ولا حظٍ كبيرٍ ل .. أخطت الجره يقديّها
مخابي الثوب تومي ما دخلها من زمان ريال=بها فاتورةالكهرب ولايمديني اقضيها
على ذيك العراوي تتعب الحادي مع الجمّال=ثلاث شهور فالورشه وشهرينٍ مغطيها
ابيها لو تجمّل يوم واجلبها على الدلال=يجيها واحدٍ حظه مثل حظي ويشريها
نصيت العسكريه يوم قالوا للنظام رجال=وقدمت الملف وصورةٍ لي كاشخٍ فيها
خذا الاوراق مني واحدٍ ما عند ابوه ادلال=سلوم الناس واهل المعرفه والطيب مخطيها
قراها في دقيقه والتفت عجلٍ علي وقال=شهادتك العظيمه يا ولد وين انت مخفيها ؟!
هزيّت الراس ماعندي تقول اني من البنقال=وقمت احب خشمه واطلبه بالله تمشيها ..
نطلها من يده شين الطبيعه والنبا والفال=وقال ازين تعود صوب خلفاتك تعشيها
تناوشته من الكرسي وعفت الحل والترحال=وضربته فالبياله عقب ما بيحّت شاهيها
خذوني للسجن لا نيب لا ظالم ولا محتال!! =مجرد واحدٍ جا يكحل عيونه فيعميها
ويوم اني خرجت اقفيت ل ..ارض الله وسيع الجال=على برٍ هواه يداوي العله ويبريها
ادور قصعة الجربوع والضب الفتي يختال=والارنب يا شفاة الروح ما احلاها وطاريها
بلا كهرب ولا بيجر ولاثابت ولا نقال=قوانين الحضاره لا تبي شوفي ولا ابيها ..

وأنا أقول الله يرزقه من سابع سماه