اتصل بي الأخل العزيز : سلمان الهدلا الرجباني
أثناء بداية التجهيزات الأولى لإقامة مزاين الدواسر مقدماً لي الدعوه بالمشاركه في أمسيات المزاين
فكتبت هذه الأبيات المتواضعه في ( خطلان الأيدي ) لعلّها ترتقي لذائقتكم
اللهم صلي وسلم على نبيّنا محمد :
اليا دعاكم داعي الطيب لبّوه=هذي عوايد كاسبين النفايل
مايلحق الطيّب ورا الطيب مشروه= يبقى كلام الصدق والشك زايل
ومن يسفه زحول الرياجيل مسفوه=ياعل جنسه فالرفاقه قلايل
وأنا دعيت وجيت والقاف خلّوه=عندي وأنا راع البيوت الجزايل
اطرب مع القيفان واسجّ واتوه=واتعب على الجزله بشتّى الوسايل
وصّوني السبعان والشعر وصّوه=بأنه يجمّلني مع أهل الجمايل
دواسرٍ راس الطويل اعتليتوه=سلايلٍ متسلسله من سلايل
اليا وقفتوا فاللزوم احتميتوه=وافعالكم ندّر ليا قال قايل
قد قالها (دسمان) قبلي وأنا أخوه=هذا الكلام اللي عليه الدلايل :
(ياطيب فعلٍ يالدواسر فعلتوه= فعلٍ سبقتوا فيه كل القبايل
حتى لو الناس بعدين سوّوه=أنتم هله من قبل وأنتو لأوايل)
أول مزاين يالدواسر جعلتوه=اشركتوا الضيفان ياهل الفعايل
وحتى ولدكم من مصيبته شلتوه=يوم أن ابن عواد شاف الهوايل
زهم زهم وأنتم على طول جيتوه=ماحالكم من دون فكّتْه حايل
خمسه معا عشرين مليون سقتوه=وقفة شرف تبرد كبودٍ غلايل
يحفظكم المعبود من كل مكروه=آمين يامحيي الثرى بالمخايل
ماقلت غير الصدق والكذب مشبوه=الصدق يبقى يارجال الحمايل
وختامها ياطيب فعلٍ فعلتوه=فعلٍ سبقتوا فيه كل القبايل
دسمان المذكور في القصيدة هو / شاعر القبيلتين الشاعر : دسمان بن مناحي السبيعي
تقبّلوا فائق التقدير
أخوكم / راكان بن بدن السبيعي