السلام عليكم ورحمة الله
كل من يعرف محمد فراج وقريب منه يعرف حجم مصيبته0 الحمدالله الذي جعلنا مسلمين نرضا بالقدر خيره وشره في الجمعه الماضي فقدت في يوم واحد في وقت واحد أبو فهد والفهد الأول اميرنا ،وحبيب قلوبنا واغلى انسان رفيق دربي صديق عمري روحي كل شي في هذه الدنيا يذكرني به 0،
والثاني رفيق القاف، حبيب القلب ،صديق من اعز الاصدقاء، كم امسيه كنت أنا وهو ،كم مجلس ضمنا بيننا تواصل وصله واسالوا ضلعنا الثالث الشاعر عبد الله بن راجس الخضاري الله يطول عمره على طاعه0
الحمد لله على كل حال 0
انتم تعلمون اني لا اجيّر مقدمات لقصائدي ويعلم الله أني مارثيت بوي الله يرحمه واموات المسلمين وهو اغلى شي في الدنيا ولا احد لاني لااجيد الرثاءولانها ماهيب لحية شعر فالمصاب اكبر بكثير وعزاي انهم انشاء الله من اهل الخير نحسبهم والله حسيبهم
وتوفيا في يوم الجمعه
وكثرت المصلين عليهم
وثناء القريب والبعيد ودعوات المسلمين
الله يرحمهم ويبيحهم دنيا واخره
====================================
أرثيه لا0لا يهبا الشعر يرثيه=أبكيه لا0 لا يهبا الدمع يبكيه
ماهيب لحية شعر ولا لحيةدموع=الله يجبر كسرنا في عزاويه
بوفهد باقي لنا حي مامات=رجمٍ طويل نايفاتٍ مبانيه
الجود طبعه والخلق به طبيعه =إسمه ورسمه والمكارم مواريه
وجهه وجاهه فاح طيبٍ على طيب= من يذكرون الطيب يذكر معاليه
باقي له الذكرى على مر الازمان= لا0لا ورب البيت مانيب ناسيه
لاوالله الا راح يا سعود غالي=راحت معه روح الغلا روح مغليه
يا سعود عيني جف ماها بكت دم=أخاف نبضي لايوقف و انعيه
من للخوي إلا الخويّ الموالي=ودّي أبرّه قبل ما رحل واخاويه
الله يرحمه ويبيحه ويقبله=الله يعفو عنه عجزت مراثيه
صندوقه المحكم بصدري دفنته=يدفن معه في قبر ما وايقوا فيه
وكلٍ بيوم الحشر يقرا كتابه=كفا بنفسك المرأ يقرا معانيه
لكن عوضنا في الليالي المقابيل= الشبل من ذاك الأسد لاتحاتيه
حرٍ مجرب ضاريٍ طير حاران=صيده من الشرّد اليا هد يدميه
عبد الله محمد صبي المناعير=من آل درعان المكارم نهنيه
لاعدوا شيوخ العرب هم يعدون=أهل الصخا أهل الثنا تعدوا واعديه
نعم النشاما كل من هم علم فوق=فروخٍ نداويه 0وانت المناديه
لامازهمت الذيب كنت أزهم أبوك=وابوك مات وبزهمك يا موفيه
ياميرنا تكفا عوضنا ترا فيك=لبيك لبا بوك في القبر لبيه
أوصيك بالتقوى وطاعة هل الشان=وللمستقيم الله يدلك وتمشيه
تمت وصلى الله على أحمد وسلم =نبينا و آله وصحبٍ مواليه