الصديق العزيز الشاعر/ عبدالعزيز بن محمد الروقي العتيبي من فخذ الدلابحة أهالي الرفايع بالجمش وبدأت صداقتنا من أيام دراسة الجامعة وكان طول معرفتي به نعم الرجل في جميع المواقف وهو بالنسبة لي أخ وليس صديق.... وعلى كل حال لا أطيل عليكم بيني وبينه الكثير من المساجلات أختار منها قصائد مناسبتين الأولى كتبها هو في(حفلة زواجي) والثانية كتبتها أنا في (حفلة زواجه) وإليكموها :
*** شارك عبدالعزيز في حفلة زواجي بقصيدتين (إليكم ما أحفظ منهما): ـ
الأولى :
بسم الذي يعلم خفيات الاسرار=أبدي كلامي واطلبه بالتساهيل
يالله يالمعبود ما غيرك أختار=رحمتك يوم الحشر يوم التهاويل
ومن بعدها بارسل سلامي للاخيار=زحول الرجال اللي لهم كل تبجيل
من ديرتي لدياركم جيت مختار=ماهمني بعد الطرق والمثاقيل
والقصد أبارك للخوي مكرم الجار=نايف ولد محسن عشير المشاكيل
من لابة(ن) تعرف على كل الاقطار=آلاد زايد نعم هاك الرجاجيل
قوم لهم في عالي المجد تذكار=أهل الكرم والطيب ذباحة الحيل
مقدارهم زايد على كل مقدار=وصبيهم يفرق عن الناس بالحيل
واختامها واعداد همال الامطار=واعداد ما طافوا ولبوا بتهليل
صلوا على المبعوث رحمة من النار=المصطفى الهادي رفيع المنازيل
وقصيدته الثانية :
البارحة يوم العرب ممسين والعالم هجوع=وهجوس فكري في ظميري ماهتنت بمراحها
تزاحمت في خافقي من كل شكل وكل نوع=لين امتلت دلو القصيد وهاجسي مياحها
وسجلتها والقصد أبين فرحتي بين الجموع=واصوغها صوغ الذهب والفها بوشاحها
في يوم ستة من شهر شعبان واليوم الربوع=ليلة خميس وكل ليلة عامرة بافراحها
جينا نلبي دعوة(ن) من خاطر(ن) ماهو صنوع=أسبق من مهار الاصايل عديها وجماحها
للصاحب اللي ماسك(ن) درب الشكالة ما يتوع=له في ضميري منزلة ما فيه شخص(ن) زاحها
من لابة(ن) يوم الحرايب جمرها غادٍ ولوع=تارد على حوض المنايا شلفها ورماحها
آلاد زايد كاسبين النعم مع حسن الطبوع=يوم القبايل عزها تستاهله بسلاحها
قلته وانا لي لابة(ن) تقدر على دهم الجموع=نركي على كبد المعادي ما يزيد جراحها
يشهد لنا التاريخ ما فينا ضعيف ولا خنوع=ربعي عتيبة وافتخر لاصرت أنا مداحها.
وأما قصيدتي في حفل الأخ عبدالعزيز:
يا بو خميّس* شغل الجيب ذالحين=خابرك أنا قطع الخرايم تجيده
روّح علي يا مسندي خل بعدين=ومع خط مكة ادعس البنص سيده
لا جاك مفرق (لبخه ـ حويته) يمين=اسر معه ترى المسافة بعيدة
انحر بنا ربع(ن) حشام(ن) عزيزين=أهل الفعول الماضية والجديدة
تاريخهم ناصع وعندي براهين=الشاهد الله والخلايق شهيدة
عتيبة الهيلا صعاط المجانين=وافعالهم بين الخلايق فريدة
تشهد لهم في نجد غُبر الميادين=يوم إن كل(ن) مكسبه حوشة إيده
جينا لهم والشاهد الله طربين=في ليلة(ن) يالله عساها سعيدة
في ليلة(ن) أنا احتريها لي سنين=للصاحب اللي أشهد إنه وليده
عبدالعزيز ابو محمد ونعمين=حر(ن) ملا بنك المراجل رصيده
هو راعي المعروف الاول وذالحين=وحقه علي مهوب نظم القصيدة
حقه نجي يم الرفايع مهنين=ونشاركه ذالليل حفله وعيده
في ليل ستة عام ستة وعشرين=باول رجب عسى السعادة مديدة
خط اليراع من الشعر.. بس بيتين=ولو هو على كيفي مليت الجريدة
واختامها يا الله يا ناصر الدين=وفّق صبي الجود للي تريده
وسلامتكم جميعاً ،،،،،،،
*: (أبو خميّس) : بتشديد الياء: كنية ابن عمي سحيم بن حمير بن مسرع