القصة حصلت في قبيلة بني هلال والله أعلم والتي كانت منازلهم جنوبي نجد من صوب جرف عليا ، حيث كانت لهم السلطة في نجد كلها قبل ( سبع مئة الى ثمان مئة سنة ). وغريسة هذه بنت من بني هلال عشقت شخص من القبيلة اسمه زيد وارد ان يتزوجها فرفض اخوها عامر واحجروها بني عم لها عن زيد .. ( منع أبناء عمها تزويجها لزيد بحجة اولويتهم لها ) فعانى العاشقين مرارة ذلك كثير ، وقد بذل زيد كل الوسائل الممكنة ليقنع أبناء عم الغريسة ليتركوه يتزوجها فرفضوا ذلك ، ثم ضاقت بزيد الدنيا وقرر الرحيل عن الديار فلما علمت الغريسة ادركت ان زيد سيرحل دون رجعة ضاقت بها الدنيا .وقالت لرفيقة لها ..( تشوّفي لزيد مع اهل الخيل فإلى شفتيه وشافك) فقولي
يا غرسة في الـوادي=عـليـك ليـــلاً بــــادي
وهذا كان تلميح لزيد (إن حبيته الغريسة تحتريه في الوادي الى جاء الليل على شان تسلم عليه قبل يشد عنهم )وان رفيقة غريسة يوم قالت ذا الكلمة كان به شايب يسمونه (الأوقيشر) وانه فطين وخبيث في نفس الوقت ..يعني يحب يشب الفتنة .ويوم سمع كلام رفيقة الغريسة فهم قصدها .وهو يروح يعدي لين اقبل على اخو الغريسة اللي اسمه عامر ..ويوم قرب منه قال:
الغـــرس ذا الليلة صـــرامه=وعامر يلوسب في العمامة
(يعني ان الغرس بيقطع ثمره في هالليلة والغرس هو غريسة .وعامر يلوسب في العمامة يعني انه غافل ما يدري وش صار في غرسه)
ويوم سمع عامر كلام الاوقيشر ارتاع ودرى ان الاقيشر يقصد بالغرس شي تحت حكمه ..وقال للاوقيشر بيّن وش مغزاك؟ ..وقال الاوقيشر :برّق في اللي وراك .ومشى الاوقيشر ..وعرف عامر ان القصد اما مرته والا اخته .وجلس طول الليل متغطي بالعمامة وهو ما نام .لين سمع صوت شي يفتح رواق البيت وقام يتتبعه (والى هي غريسة رايحة تبي تسلم على زيد )
يوم واجهت "غريسة" -- "زيد" كل منهم بكى .. وكان عامر مدركهم بسيفه وهو يذبح عامر وهو ياخذ اخته ويربطها ..وياخذها بعيد عن العرب في هضبة فيها مثل الغار وهو يقطع رجلها ويخليها مربطة في الغار ،، ومن القهر كل يوم يركب فرسه ويجيها في الغار ويسقيها ماء على شان ما تموت ويقطع عضو من اعضاء جسمها ..وجلست على ذا الحال ايام ويوم جاء عقب عاشر يوم الى هي ميتة وكاتبة بدمها على صفاة الغار القصيدة هذه:
قـــالــت غـــريسـة زيـنـة القـــول والنبـــا=فجــاني زمـــاني والمـقـــــدّر دهـــانيـــه
تهـــاويـت مـع زيـــد وطــابـت ليــالنــــــــا=ثمــــان سنيــن في طـرابــه وامـــانيــــه
هــاواني وهـاويتـه على الـونس والهــوى=وقـطفـنـا ثمــر ما لاق والنفـس فـــانيـــه
سقـانـي شــراب من ثمـانــه وانــا بـعـــد=سـقيـتـه شـراب صــــافـي مـن ثمـــانيـه
يـا ليـت زيـــد طـــاعني يــوم اقــــول لـــه=اسـر وكـل النــاس في الـنــوم هــانــيـــه
ولا طــاعـنـــي والامــر مــا فيـــه حيـلـــه=غـشـا زيــد حـلــو النـوم وانـا غشــانيـــه
ولا انـتبـهــت ألا ان زيـــــــد ضـحـيــــــــه=نـعـيتــه ولــــو هــــو حــيٍّ نعــــانـيـــــــه
ولـمـا اقـطعـــوا رجـلي تـراكيـت بـالعصــا=على جــال قبـره قـلت مـــا جــاه جـانيـه
وبـعـد اقطعـوا الاخـرى تـدربت جـثـّّتـــــي=علـى قبــر زيـــد وقـلـت هـــذا مكــانيـــه
الى مـت مـا سـايـلـت عـن وابـل الحيـــا=ولا مـن حـفــر قـبــــري ولا مـن نعـانـيــه
عـفـا الله عن زيـــــد عـشيــري ذنـــوبـــه=ولــو هــو عصــاني يــوم اقــول إسـر ثانيه
محــا الله عن زيــــد عـشيـــري ذنــوبــــه=ولــو كـــان في حـــوض المنـيــة رمـانيــه
يـــا حــافر للـقـبر وســّع جـــــوانـبــــــــه=عـلـى جــانـبٍ مـن زيـــــد لا تبـعـدانـيـــه
المـقصـــد انـي مــا اقـولــه بخــاطـــــري=ابـي الـى جـــاء الـوبــل زيـــد سقـانيــــه
أوصـّـيـك يـا نـقـر الـصـفــــــا لا تغـــرّنـــي=ان جـــو عـــــريبٍ وارديـن شنـــــانـيـــــه
يــا مـــدوّر زيــــد تــــرى زيـــــد عـنــدنـــا=ذبـيــح الـعـمــر هــذا سبـب كـل جــانيـه
اخـــوي عــامــر يـعـطـــي القـــوم عمــره=شجــاع ويـامــــا مـن نهــــار حمـــــانـيـه
مـثــل عــامــر تـوسـم بـه الإبـل والـغنــم=وزيــــد كفــى عــن ربـعــي الا ثمــــانيــه
ابــوي وأخـــوالــي وعـمـــي وعــــــزوتي=وذبـــح الشفـايــا في عشيــري هنـــانيه
يوم قرى عامر ابياتها اللي كاتبتها بدمها قبل تموت وقرى بيتينها اللي تمدحه فيها انه غشي من الندم ومن الحزن وتندم على انه ما زوجها لزيد على سنة الله ورسوله وحارب الطعام والمنام اسبوعين لين مات حزن على اخته .
وسلامتكم ،، عسى أن تنال رضاكم،،، مع خالص التحية والتقدير ،،