السلام عليكم ورحمة الله وبركاته
اهديكم هالمتواضعه عسى ان تصل الى مستوى رضاكم ,,
نأسف تعثر يالوليــف اتصالك = سدد فواتير الغلا و انت مديون
راجع مكاتبنا و جدد وصالك = و اترك نميمة كل عاذل و ملعون
ترى رصيدك عندنا ما تهالك = مير انت طاغي بالقطيعه يا مجنون
اللي حكا لي هرجةٍ هو حكا لك = كذبتها لك و انت صدقت و شلون
اعرف مقامك قبل تنطق مقالك = لا تظلم اللي في محبتك مفتون
و افهم ترى ما و الله بفالي فالك = و انت اتسمّع للعواذل يقولون
راجع دفاتر حبنا و ان بدى لك = غلطه بعدلها على كيف ما يكون
مير انت عاتبني و عطني سؤالك = و اخذ الجواب موثقٍ لك و مضمون
قـلـنا من اول مـا نـبدل بدالك = و ماني من اللي ينقض العهد و يخون
شـفنا مزايـيـنٍ تعدوا جمالك = مـيـر ان حبك سرّ في القلب مدفون
ما واحده منهن خذت من خصالك = حلو المظاهر و المخابر بلا لون
تنعاف شمسك عقب فيّة ظلالك = و صوتٍ ماهو صوتك يعاف التليفون
فديت انا ربعك و عمك و خالك = و فديت من بيّح بي ما كان مكنون
اخلص وجدد يا وليفي وصالك = حد ائتمانك بالغلا صار مليون
و سلامتكم ,, و سامحوني على القصور ..
اخوكم / فراج الغريري ...