من لا نشدني ما عطيتـه علومـي=لو جيت من بعض المطاريش بعلوم
اسكت ومن بعض الكـلام مخدومـي=زود الكلام وناقصـه فيـه مخـدوم
واجلس على رغبة هوايـة وقومـي=اسمع وخلي عايـل الهـرج وقـوم
أرفى لسانـي والضميـر مختومـي=يبقى على ما فيه مغلـق ومختـوم
والصمت حكمـة للبيـب الفهومـي=وكثر اللغـى يثـر مناقيـد وثلـوم
والصمت ستـرٍ للخطـى والثلومـي=خصلة وقار ويودع الرجل محشـوم
وعلمٍ ما هو مطلوب ما هو لزومـي=خله ويبقى داخـل الجـوف مكتـوم
يمكـن تقولـه والقبـول معدومـي=ويصير علمٍ ناقص الـذوق معـدوم
وإن نشـدوك الطيبيـن القرومـي=هات العلوم الطيبة واسمـع القـوم
خلـك لجـزلات المعانـي عزومـي=واعرف ترى بالهرج طيب ومذمـوم
وهايبٍ من عنـد منشـي الغيومـي=الطيب وهبة والردى حـظ مقسـوم
والحر عن هزل المعانـي يشومـي=الطيب نوه والـردى عنـه مفطـوم
وإن شفت لقاف السوالف يزومـي=هرجه كثير وفيه ذوقٍ مـن الثـوم
اعرض وخله فـي سبيلـه يعومـي=خله عسـاه بضيعتـه دايـم الـدوم
واصبر ليا لمـت عليـك الهمومـي=ساعة بدل ساعة ويوم عوض يـوم
واطلب من الرب الكريـم الرحومـي=اللي من الظالم نصـر كـل مظلـوم
وان شفت من بعض الرفاقة وهومي=لا تنطح الخـلات بالسـب واللـوم
اترك وسامح والردى مـا يدومـي=والطيب يبقا لك مع الحـي مرسـوم
إلا ليـا نـاش الكـلام الخشومـي=الصبر ما هو زين والخشم ملطـوم
صبرٍ على العوجا دليـل الرخومـي=والـذل مـا هـو للمناعيـر للبـوم
والحق لا تخفيـه تحـت الكمومـي=عده ترى من يكتم الحـق محـروم
واترك سبيـل مضيعيـن السلومـي=نقالة الهرجة علـى غيـر ملـزوم
اللي على الغافـل تشـن الهجومـي=بياعة الذمـة رخيصـة بـلا سـوم
دحامة المجلـس كبـار الجرومـي=جرمٍ كبيـر ولبـة العقـل مفـروم
هدايـد(ن) لمعورجـات الرقـومـي=ضبـع الرجـال وللغناديـر داهـوم
تمت وربي لـه صلاتـي وصومـي=على الرسول اللي عن العيب معصوم
،،، وسلامتكم ،،،
القصيدة للشاعر/ مقحم حمود الحربي