هذة قصيدة الشاعر ابراهيم بن ذيب آل عريمة الوداعين الدوسري بمناسبة حفل الدواسر الذي اقيم في منطقة النعيرية ويمتدح فيها قبيلته ويرحب بهم ويذكر بعضاً من سوالفهم ويذكر فيها قصة الأخ سعد بن حباب آل ضويان الودعاني صاحب الموقف البطولي وللشاعر الاسبقية في في ايراد هذه القصة قبل اي شاعر واليكم القصيدة :
اخير مابدي به على كل مقصود=ذكر الإله اللي خلق سبع الاكوان
ثم الصلاة عداد ما هبت النود =على النبي الهاشمي نسل عدنان
وخلاف ذا بابدي وبابيح سدود=بيوت شعر(ن) مالها اليوم كتمان
برحّب بربعي هل الطيب والجود=ترحيب صافي قلب من صادق لسان
فيا مرحبا ما مرت البيض والسود = بمن سطروا في صفحة المجد عنوان
يا مرحبا مليون بالعد وتزود=باللآبة اللي في العرب شانهم شان
دواسر(ن) كنيو على دوسر العود = اهل الفعول مطوعة كل فسقان
حنا الدواسر طيبنا ترثة جدود = متوارثينه من مناعير جدان
من جود ربي نكرم الضيف ونجود = في حاضر الطفرة وفي غبر الازمان
وبالسيف نحمي طارف الحد ونذود=وصيّة الجدّان في رسوم الاوطان
يشهد لنا التاريخ والعالم شهود = بفعايل(ن) معها على الحق برهان
لو قلت ما تحصى فلا جيت في زود=ولا نيب لا مخطي ولا نيب غلطان
فعايل(ن) من روضها بقطف ورود=ورده على ما قيل من كل بستان
الأوّله حنا ذرى كل مطرود=لو كان طلابه زعيم(ن) وسلطان
وحنا ودينا الجار من جدر مهدود = من غيرنا يادى من اسباب جدران؟
وحنا الخوي لاخان به خاين عهود=ياخذ بثاره داني الناس واخوان
والريشة اللي جا لها يوم مشهود=وخذت من الشيخان بفعول شيخان
وجمالنا بالحرب ترثع بها قيود = يشهد بها الفرسان في كل ميدان
وبدّ القبايل حن لنا سبعة فهود = من اربعين(ن) داهموا قصر عجلان
واخر مواقفنا فعل كاسب الفود = ابن حباب اللي رقى راس ما بان
يوم انتخت ما بين فاقد ومفقود=بنت(ن) تشوف الموت شوف(ن) بالاعيان
في موقف(ن) يبغى شجاعه ومجهود = وعزم وصلابة راس واحسان وايمان
قال ابشري بالعز وعضودي عضود=نعيش ولا نموت سيّان سيّان
ولو كان خلاها فلا هوب منشود=مير الحميّة ماتخلي كحيلان
ثم شالها والموج يزمي كما الطود=والناس حوله بين هالك وغرقان
والطيب عند الناس دين(ن) ومردود =والاحسان عند الله يجازى بالاحسان
والله عطانا حب الاسلام ونذود=عن حوزته بالسيف الاملح وبالزان
وان كان به من يحسن الظن بحيود=فحنّا على التوحيد شيب(ن) وشبان
من فضل ربي ركع(ن) دوم وسجود = يوم ان بعض الناس يجهل بالاركان
يشهد بها فلبي قبل سبعة عقود=ينطق بها دفتر وصفحه وديوان
وحنا لنا عادات نرقى بها سنود=نسبق على العليا شباب(ن) وشيبان
مجالس(ن) ما الباب فيها بمردود = لا كنّها مبنيّة(ن) دون بيبان
لعب الورق فيها رزيّه ومنقود=وما تعرف الشيشة ولا شرب دخان
دخانها عرن الحطب وازرق العود=وبرية(ن) تجلى عمس كل عمسان
وحيل(ن) الى من علّقت تكسر العود = ولا على كبش(ن) سمين(ن) من الضان
هذا مضى والقاف حاضر وموجود = خلوني ابرد حر كبدي بالالحان
ما كل يوم(ن) عيد ياخوك ياحمود =مير اتركوني والقوافي والاوزان
ابرد بهن كبود واحرق كبود=وارضي بهن اصحاب واغيض عدوان
واذكر بعض ما دار في البال واعود = للآبة اللي شانهم في العرب شان
واذكر بعض ما جاد به خير معبود=على هل العادات ذربين الايمان
الله عطانا الماء مشاريع وعدود = حلو(ن) قراح(ن) مثل هتان الامزان
والله عطانا اللي تهزع من النود = هدب الجريد اللي ثمرها له الوان
والدوسري ذوده يجي خيرة الذود = عند القبايل ما تقدر بالاثمان
ومضامي(ن) بيد(ن) الى ما له حدود = شرق وشمال وغرب وحدود نجران
ومادامها ميراث والد لمولود = فانا العريمي صلب ناصر وودعان
اهل الحميّة سعد من كان مضهود = ولا خير في قول(ن) غلى غير برهان
يشهد بها راعي المعم ابن عبود = يومه يهوز الدار بثياب الاخوان
هدّف على الفرعة رجال آل مسعود = لعلّها تصبح مقر(ن) لقحطان
مير اعترض دربه صناديد ويسود = واجلوه والراضي من القوم زعلان
هذا وصلوا عد وارد ومورود=على النبي وزبدة الهرج نيشان