قصيدة الشاعر سعد بن سالم الردعان الدوسري وهذه القصيده ارجو ان تحوز استحسان الجميع :
عزتي للي سواتي من الفرقاء شقا=بين حب وبين عشق وبين لوعات وشوق
لابغا يدله من الوقت ساعه مالــــقا=غير عبرات الحناجــــــر ودمع وسط موق
صرت انا والهم رفقه وصحبه وصدقا=في بحور العشق هايم ماغير اصحى وافوق
في هوى من هو سباني على وضح النقا=تل قلبي في يــده واعتلى عرش الخفوق
صابني بين المعاليق رمح(ن) محرقا=يوم سلهم لي بعين(ن) كما عين السروق
احسب اني مت من سبته والله وقا=اتظاهر بالسلامه وانــا منـــه مــحـــــروق
والله ان القلب ماظن في الحب وهقا=لين شفته معتلي فوق عرش القلب فوق
احسب اني من عنا الحب والعشق بتقا=مير دولاب المقادير ساق القلـــب ســــوق
في هوى من هو على البيض باوصافه رقا=ماخذ(ن) فوق الغنادير تاجين(ن) وطــــوق
في جماله ليل اظلم وصبح مشرقا=كيف ربي يبعث اللـــيل حــزات الشـــروق
اذكر اني يوم جيته وجددنا القا=يوم اخذنا بالمــواثيــق مـــيثــــاق وثــــوق
يوم جيته قال يامرحبا قلت البقا=قال وينك قلت جيــــتك ونــا قلــبي يــتوق
قلتله مادام انا وانت في الحب عشقا=لاتسمع هرج عــاذل و لا كلمــه ســفــوق
يوم وادعني وعينه بدمعه تغرقا=قلت تكفا كفكف الدمع انا قلبي شـــــفوق
يوم قفا كن في الصدر ناب يزرقا=ما بقا عقبه من الشوق في الصدر معلوق
لا طرت زمة نهوده وذاك المطرقا=مخطر(ن) مني تفجر شـــــــرايين وعروق
كل ماخايلت برق(ن) بمزنه يبرقا=قلت جعله فوق داره هماليــــل صـــــدوق
وش بقا من عقب ماقفا حبيبي وش بقا=غير عبرات الحناجر ودمع وســـــط مــــوق