بسم الكريم الي له العرش ينهال=الي ملايكة السما في رحابه
ولا إلاه إلا هو الواحد العال=رب البشر رب الرسل والصحابه
يامن له القوه وهو خير ماقال=باياته الي نزلة في كتابه
ودعوتك يامبارك لنا عز وجلال=وعند القبيله دعوتك مستجابه
ذي عادتك ياطيب العم والخال=علمك جميل وكل رجلن حكابه
وبسم السهول وبسم ذربين الأفعال=وبسم المعزب قلتها بالنيابه
يامرحبا ترحيبتن تشرح البال=فيها من اسلوب التواضع مهابه
اسلومنا تمشي على مّر الأجيال=ولاظنتي كل السلوم إتشابه
مانقبل الهزله ولا نكفح الفال=والضيف ماعدا علينا ركابه
يلقى هلا..واقلط..وطيبن..وفنجال=وعلى الشحم والخير نكرم جنابه
وصرنا لوصف الجار مضرب للأمثال=ندراه ونعزه وننقل صوابه
انقول ونطول الأقاويل بفعال=ونعطي على قد السؤال الإجابه
ولاكبرت الهيه وزادن الأهوال=إن شيل حمل الي زمانه غدابه
سهول لامن إصطفق جال في جال=نرمي معادينا عشا للذيابه
صلفين لامن الزمن والدهر مال=شجعان في يوم الوغا والحرابه
كبيرنا له مع هل العرف منزال=وصغيرنا للضيف ماصك بابه
نبني على روس الشواهيق الأمال=وهقواتنا فوق السما والسحابه
وماهمنا بعد المسافه والأميال=وإنقدر الداعي على مادعابه
وإن قدر العاني على كل الأحوال=والطيب إمن الناس نحسب حسابه
واهم شين يحسبه كل رجال=يوجب العزام لادق بابه
إختامها واعداد ماوادين سال=والمعذره منكم على كل مابه