يا ملّ عينٍ ما تهنّت بالإمراح=و الكبد كن فيها وقايد سعيره
قمت أتجلّد و أرقب الصبح ينباح=و العين تذرف بالدموع الغزيره
ما شفت من الأجواد من جاء و من راح=يقطعك يا عدّ قليلٍ خميره
يا فري قلبي فرية الدلو لا طاح=عدّه طويلٍ و إنصرم من بعيره
متمايزٍ كله خرابيق و شلاح=لا ينرّقع فريه و لابه بصيره
أو فري خامٍ عند طرّاد الأرباح=راعي دكاكينٍ بنى وسط ديره
لا قام يطلوِح به على الذّرع طلواح=بين الأصابع قمت توحي قريره
على الذي زينه عديمٍ بالإملاح=لا هيب لا عنبا و لا بالقصيره
الراس ذيل شمِرّةٍ له تنيفاح=حمراً ترادي توّ وجه المغيره
ركّابها يأخذ على الخيل مشواح=و يردّها يمنع توالي الكسيره
لا جاء نهارٍ قادها الرّمي و صياح=وين أنت يا شوق الطموح العشيره
العين عين اللي لها حط ملواح=قطّاعة في الصيد سوٍّ حشيره
بكفّ شغمومٍ وراء المال سرّاح=لا من ضوا ما يعتجل بالسفيره
دايم لحاله ذلّ من كل مشفاح=في خايعٍ فيه الحباري كثيره
الخشم سلّة سيف بكفّ ذباح=بكفّ جزّارٍ تصوّخ لأميره
بكفّ عبدٍ كل ما رد له لاح =في غارب المجرم يروّع صريره
ابو ثمانٍ ذبّلٍ بيض و صحاح=قول النّساء و إلا عليه الستيره
العنق عنق اللي رعت عشب الأبراح=هجّت و من صكّ العرب مستذيره
أدميّةٍ قامت تشمشم للأرياح= و هي قايد الجمِله و هيّ الأميره
و عليه من الفضّه مثاقيل و شباح=و مراسلٍ من شافها له فكيره
أبو نهيدً في التواصيف تفاح=توّه على نبته ثماره صغيره
ما شمّه وريعٍ يسكّت إلا صاح=و عليه من لمس الحبابين جيره
و الردف شطّ حويّر عند مصلاح=مسرهدٍ يرضع من أمّه و ضيره
الساق مثل مدرّجٍ عند فلاح=نجارها بصري يمينه شطيره
حطيت قلبي يا اريش العين ملواح=في كف صقّارٍ ذلوله مغيره
أقفى على طيره معاصير و رياح=طلعه بعيدٍ و إختفى في مطيره
سلام مني له مع كلّ من رّاح=سلامٍ أحلى من حليبٍ بشيره
الشعر له باب يغلّق بمفتاح=و عليك يالجاهل بيوته عسيره
كلّ يقول القول من عرض ما لاح=أيّ التّنك صنعه و صنع النّجيره

المشاركة الأصلية كتبت بواسطة صالح الجعيدي السلام عليكم ورحمة الله وبركاته ،،، صح لسانك أخي الغالي/ عبدالله الصليبي الحقباني و صح لسان الشاعر/ناصر بن عبدالله آل باتل الحقباني (رحمة الله عليه). لا هنت و بيض الله وجهك على القصيدة الجزلة والممتعة . وتقبل خالص تحيات أخوك ومحبك في الله/صالح الجعيدي

الشعر له باب يغلّق بمفتاح=و عليك يالجاهل بيوته عسيره