انا حلفت ان ابتعد عن حياتك =واعلنتها بإعلان .. عاجل خبر هام
بس اعتبرني من حدى ذكرياتك = اللي لها عامين واللي لها عام
غايه من الغايات عندك .. وجاتك = يعني حصل ماكنت تطمح ..ومادام
تحققت لك حاجه من امنياتك = ارجوك سلم لي على ذيك الأيام
يوم القصايد في غرامك وذاتك = واغرق على وجه الورق حبر الاقلام
يوم اني انطر همسةِ من شفاتك = وشوفتك عندي حلم من ضمن الأحلام
يوم اترجى رحمتك والتفاتك = واكامد انواع المواجع والآلآم
والله وفي الحُب العفيف وغلاتك = اني عشقتك عشق من بين الأنام
ماظنتي قد مر غيرك ... وفاتك = بعته من أول سوم من فَم سوَام
وياللأسف ماحدِ يسوي سواتك = يخسر محبة صادق الحُب وينام
لابارك الله في حبيب صفاتك = بعد الغلا يحكم حبيبه بالاعدام
ياظالمه وش فايدتها صلاتك ؟= والله مايقبل صلاوات ظُــــلام
تطغى على صدق المشاعر عياتك = ومشاعر العُشــاق مشاعر إيتام
وودعتك الله . وأُخلدي في سباتك = واذا صحيتي اكتبيني ابمرسام
وحطي مع أسمي داخل مذكراتك = اطرف قصيده من قصيد ابن وسام
ولاشوف بكره وحدةِ من خواتك = بعدك تراني معلنن رفضي التـــام