بيت شمخ في عالي الرجم مبناه=ومزخرف مثل البيوت المنيفه
خمسة ابواب حطها في زواياه=ومطول من الكبر مرقا رصيفه
لا شك عند الموجبه ما لقيناه=صكت ابواب البيت في وجه ظيفة
لعل قصر ما لجا الضيف باحماه=جعله يهدم بالثقال العنيفه
ياليت ربي لدنا ما نصيناه=ولا الله كتب لي وقفة عند جيفه
القصر تامر به وتنها به انثاه=هي سيده والحاضره والخليفه
هذي عطتني درس ما والله انساه=أني ما ظيف اللي عزومه ضعيفه
ضاع الكلام اللي زمان سمعناه=قول خدعنا ما لقي له طريفه
يا عمر عيني واسفا اليوم عمراه=أني نصيت اللي فعوله طريفه
والله ان اعين كيفة الراس وامناه=ايضا ويلقى هاشل الليل كيفه
هذاك ابوي اللي عسى النذل يفداه=ومثله رجال تحتمل للكليفه
عيد الرجال اللي من البعد تنصاه=تبشر بكيف والعلوم الشريفه
يقضي اللزوم ويفرح بكل من جاه=يوم عليه سعيد عيده وريفه
ما هوب نذل قاصرات نواياه=وموكل بالبيت لامر العفيفه
فالمدح ما يستاهله كون شرواه=والا الردي ذمه على قدر زيفه