::: مـنتدى قبيلـة الـدواسـر الـرسمي ::: - هــوانــا صـحـاري نــجــد

هذه القصيدة للشاعر محسن الدوسري كتبها في دولة تركيا عندما كان في رحله علاجيه مع والدته (رحمها الله) تقريبا في عام 1393هـ .

عساك الزعل يا راضي القلب ويش ارضاك .. غريب البلد في غربته شاف ماعافي
وأنا كن حالي حال مفتون بالتنباك .. قضى الكيف منه وصرت مثله بالأوصافي
قصرت القدم والحال ياهن مايخفاك .. يعرفه قليل المعرفه وأنت عرافي
هجرت المنام وقابلت عيني الشباك .. تذكرت نجد وهي ربيعي ومصيافي
جمال الطبيعة ذكرتني سهل تبراك .. مداهيل قطعان الرعايا والأسلافي
هوانا صحاري نجد يادار مانهواك .. وقلبي لنجد ومن سكن نجد ميلافي
أنا بذكرك يانجد وأعيش في ذكراك .. أحب المدينة والقرايا والأريافي
يعيش الضعيف بجيرتك لالجا بحماك .. سقاك الحيا يانجد الأوسط والأطرافي
ترى لو نغيب سنين يانجد ماننساك .. وأملنا نجيك وغيرك الدار تنعافي
ذكرت الخليج ودك بـ أقصى الحشا دكاك .. طرى بي على شط البحر موجه الصافي
وأحب الحجاز اللي بها نبت عود الراك .. وبيت به المسلم يصلي ويطافي
على الله ياطرف حربت الكرى شكواك .. عزيز الجلال وعالم الغيب والخافي