جتني معاني الشعر ياسعود تنقاد =تشدي هماليل المطر في سحابه
طير السعد رفرف بزينات لنشاد=والروض زان ولبس زاهي ثيابه
ياموطني ياللي رقى روس لمجاد =تحمي حمى التوحيد كل درابه
يامنبع الاسلام والخلق شهاد= موطن رسول الله دار الصحابة
ياقبلة الاسلام يادارلجواد = بيت الله اللي كل خلقه تهابه
وطيبة بها قبرالنبي خير من جاد=ارواحنا دونه ونفدي ترابه
لامن تنكر كل جاحد وحساد=غره عدوالله وجمعة كلابه
ناطاه بدروع ونرميه بزناد=الين يرجع من عماه لصوابه
هذا جزاء الخاين جزاء كل لوغاد=هذا جزاء من خان وكر ربابه
من شذ منا بس ويش عاد ويش عاد= الحق يرسخ والزبد في شعابه
ماراعنا الكافر بعد وتعداد =واعلامه الماجن وحكي حكابه
حنا اسود الحرب شياب واحفاد =نارد حياض الموت من كل لابه
حنا ذرى لسلام للناس قواد=معنا كتاب الله فصل خطابه
معنا جنود الارض للحرب تنقاد=حتى السماء من فوق تفتح ابوابه
حكامنا سادت على كل من ساد=في خدمة المولى وتحكم كتابه
ياموطني علك من الوسم رعاد= اقبل دعاء يارب عبد دعى به
عيشي بأمان الله على رغم من كاد= من قدنا؟ومين حضرت جنابه