الا يالله المعبود ياعالم الأسرار=ياربٍ واحدٍ نرجي لمرضاته
فأنت السارّ ياربي وأنت الضارّ=وأنت اللي تجيب العبد دعواته
تهونّها على رجلٍ زمانها جار=وتشفي علته .. وتفك زنقاته
زماني جار وانا بأول المشوار=وذوقني المرار بكل كاساته
آحل ديار وارحل من عنا لديار=ادور شرحة الخاطر وسجاته
والا ياحظي اللي دايمآ عثّار=وعيا مايله .. يقبل سميحاته
على الشده تعودنا فلا ننهار=ونومن بالقدر شحه وعطواته
تعلمنا من الدنيا دروس اكثار=ومن لا يستفيد يذوق حسراته
فلا نستصغر الحاجات لو هي اصغار=صغيرات الزمن ؟ .. تنتج كبيراته
نجد ونجتهد بالعزم والإصرار=ولا يشُمت بنا .. ولا حن بشمّاته
فقارى ماعرفنا زودة الأصفار=ولكن نعرف ان كلن وشيماته
قنوعينٍ قبلنا ظل دون أثمار=حدانا ماشكا من قل حيلاته
فلانبكي ندور مدة التجار=خذينا م الجبل إلا طماناته
ولانضحك ندور ضحكة التجار=عزازٍ نصدق ولاحن ببهاته
وإذا القُبله لها دربٍ طويل أمتار=لنا عفويةٍ تقصر مسافاته
ياكم دجنا بقاع الأرض والأقطار=وعرفنا سلم هذا الوقت وحكماته
معك مليار ؟ يعني قدرك بمليار=وراعي الشاه قدره ماأعتلا شاته
وخاوينا بوقت العسر والأستار=بوقت المستره كلٍ وضحكاته
وميزنا الوفي مالصاحب البوّار=فوايد وقتنا الأقشر وصكاته
خويٍ ماأنتفض فالماقف الجبّار=أعده بأنظري واحد من اخواته
واذا كان ابن عمي ماقبس لي نار=وضوّح لي بليلٍ حلك ظلماته
عسى عيني تهله هلت الأمطار=يروّح دون ماأسأل منه رجعاته
فلا ننظر لواقعنا بإستنكار=نعم هذا الزمان وذي مساراته
مدام ان الغيوم اصبح بها إستمطار؟=اجل خل العجب يعلن نهاياته