أخطت روابي نجد من الوسم والصيف=حتى منابتها تغير شجرها
ياالله يا اللي تخرج التمر ما الليف=يامجريٍ سفن الفلك في بحرها
أنت اللطيف وفي يديك التصاريف=وأحوال كل الخلق عندك خبرها
نسجد تحت عرشك ونرجيك ونخيف=ونصلي الغاثه ونتلي سورها
وندعيك بأسماك العزيزه بتلطيف=ونرفع أيدينا في سماك ونظرها
غثنا بغيثك يامغيث الملاهيف=من غيمهٍ تؤمر وتجلي عسرها
تمطر وعاد اسويبع الوسم ما شيف= على أول الصرفه عسى الله ومرها
من مركز الخظراء الى مركز طريف= ومن الخليج الى سواحل حمرها
يازينها لاما أكتست كلها ريف= وقامت صحاريها تطارد خضرها
جنوبها مدهال سودٍ مشاعيف= ترعي خببها لا تكبر زهرها
سودٍ كما وصف الهضاب المقانيف= ما يوجد الا شكلها في ديرها
سودٍ بعضها من بعضها بتكثيف= ما فيه سرٍ من بعيد خشرها
سودٍ حواليها تدور السواليف= هذا شرى منها وهذا ذكرها
سودٍ غلاها صاقطٍ بالسراجيف= تسوي النفوس الغاليه من بشرها
وعذروبها انها باهظات التكاليف= ما كل من يبغي شراها قدرها
وشمالها مدهال وضحٍ مواليف=ترعى الفياض اللي تقدم مطرها
وضحٍ كما وصف النصوب المراديف= سبحان خالقها مزين صورها
وضحٍ المتون مكحلات الأطاريف= يخشى عليها من حسودٍ نظرها
سند الغوارب نازلات المشاريق= مال للظهيره موقعٍ في ظهرها
كبار البراطم قايمات الغضاريف= يهد فيها كل أصيلٍ عمرها
وصفرٍ وشعل تشتبه بالوصيف= والفرق فيها بينها من وبرها
عونٍ ولون والطبايع على الكيف= فيها الطرب سبحان ربٍ صخرها
لا قالوا البراق ملأ الطفاطيف= والماء لراعي لوله لا شهرها
ثم سميت الراعي يجر الغطاريف= قامت تهبد رحلها من صطرها
وأقفت تروج تقول هجنٍ مناكيف= لا شوشت لحدٍ يجي في نحرها
والبل تبي وصف دقيقٍ وتصنيف=ورجل يعد أوصافها ما قصرها
والشعر ينقص لا غدا فيه تحريف= وليا أنكسر بيت القصيده كسرها
مير أسمحوا لي كلكم يا عواريف= هذا الذي مجهود فكري قدرها

المشاركة الأصلية كتبت بواسطة تركي الودعاني اخوي الغالي فهد الغريري صح السانك والسان الشاعر عيدان بن راجس الهوامله الدوسري وبيض الله وجهك علي القصيده الجزله والرائعه

المشاركة الأصلية كتبت بواسطة ابن هديهد فهدالغريري السلام عليكم ورحمة الله وبركاته الله لايهينك ويبيض وجهك يالقرم وياجعل بوك في الجنه أحسنة الاْختيار يابو راشد عيدان شاعر ويعد من كبار شعار الدواسر الله يصح السانك والسان ابو راجس قصيده رايعه واشكرك يابو راشد جزيل الشكر والله يحفضك ويرعاك محبك ومغليك ابــن هـــد يـــهـــد

المشاركة الأصلية كتبت بواسطة الزايدي السلام عليكم ورحمة الله وبركاته شكراً لك اخي الكريم على هذا المقال

المشاركة الأصلية كتبت بواسطة الواضح تسلم أخوي / فهد الغريري على أختياراتك الجميله والموفقه وصح لسان الشاعر / عيدان بن راجس