القاف ذا الوقت لاما كتب في غزه=مهوب في شاعره يفخر ولايزها
لا يابقايا الشموخ وتالي العزه=من امة(ن) حلـّت الذله قلاوزها
لوهزوا ارضك صمودك ماحد(ن) هزه=عقيدة(ن) راسخه والله معززّها
للموت حزه ومجدك كل ابوحزه=مفاخر(ن) بالذهب شعبك يطرّزها
انا وما املك فدايا باقي العزه=ابطال واطفال غزه مع عجايزها

ياشاعر(ن) بهّر الدلـه علـى قـزه=يفداك منهو ليا صعبت فلا احرزهـا
نعيت غزه بقاف(ن) ضافي(ن) بـزه=في خمسة ابيات يالغاطي مبروزهـا
غـزه نختنـا وحنـا نطبـخ المـزه=مليار حتى الدعـا ياخـوك يعجزهـا
كل(ن) على قز رايه محرق(ن) رزه=وعدونـا حربتـه فالقلـب غارزهـا
وعباس ياخذ مـن الغليـون ويمـزّه=ويقول يا أولمرت قلي كيف عاوزها

يالربع والحزن خيم في وسط غزه = حرب اليهود المعادي ما نميـزها
ياناس اشوف العرب باسيف منغزه = دم العرب سايلً والجرح ينغزها
ماعدنا غير نشعر والشعر رزه = الله يعيين العرب في ما يلعوزها
وشيوخنا في قمم! للذل ملتزه = هرجات من بعدها تصفيق !! مخنزها

الجرح دامي وفوق طعونه نحزه=والتفرقه للاسف حنا نعززها
الحمدلله هو الناصر لاهل غزه=وحنا مجرد شعارات نبروزها
كفاحهم صامد والريح ماتهزه=لمن غفت عين..روح المجد تغمزها
لاقال واحد خطأ !! جاء الاخر وخزه=وشلون غايتنا بالله نحرزها!!!
صرنا مجرد صور تلعب بها الرزه=ولاجات ((رايس))من اللي يقول ماعزمها

من شان غزه قوافي الشعر منفـزه=فزة شجيع ٍ سهام الموت مبرزهـا
لا يا بقايا الرضوخ ولا بقى عـزه=الا جـروح ٍ نداويهـا ونعـززهـا
قلوبنا من سيـوف الـذل منخـزه=مات الرجا في قلوب ٍمـن يعززهـا
صارت ذياب العرب تجفل من العنزه=ما عاد تقدر ذياب اليـوم تحرزهـا
العار والنار والبـارود مـن كـزه=غير اليهودي وغزه حن جنايزهـا