يالله وانا طالبك تاخذ بيديه = واختار من جزل المعاني صدوقها
بمدح شغاميم الرجال الزكيه = شجرة وفا .. متدلياتاً أعذوقها
شجعان نجد أمزبنين الضحية = خطلان الأيدي في اللقى من يفوقها
دواسراً من( زايد ) و( تغلبيه ) = حلفين من ساس الشجاعة عروقها
ربعي على الطالات فيها حميه = لاذكروا الجواد يفوز سوقها
ترعى( صخاف الشول ) في المهمهيه = بمهنداتاً صاطياتاً أفتوقها
يا هيه أنا من لابةً ( زايديه ) = يلوح معنى العز في طرف موقها
اللابه إللي كلها مقدريه = تسوف ذود الطيب يعني تسوقها
حنا ( العصاة ) ( القاسيين ) ( الدعية ) = حنا جزيلات المدايح نحوقها
حنا اسهوم الموت لا جات هيه = و حنا سعد اليام لا بان عوقها
لنا على ما قيل جرحاً وكيه = تبطي أعدانا تشتكي من احروقها
أشجع بشر من بين كل البرية = و أكرم من الغيمة إذا هل سوقها
ما للبخل في عرفنا مرجعيه = نعز نفساً كايداتاً أطروقها
فينا الخوي ماهوب ينسى خويه = يمد لقمة حاجته ما يذوقها
نشوم عن فعل الدنس والرديه = و انفوسنا للطيب نتعب خفوقها
وانا من ( آل بريك ) راس المطية = ربعاً طلوع المجد ماهو يعوقها
(طيب) و ( طناخةً راس ) و( أفعال حيه ) = و علوم ذربين اليماني تشوقها
يفخر بنا التاريخ ماحن بشويه = فخيذتاً يا حلو صافي غبوقها
شعبان نجد المخضرات الندية = منا غدت جنه ولاحت ابروقها
هذي فقط نبذه عن أهل الحميه = و الا القبايل وافياتاً حقوقها