محك الرجال وطيبهم ساعه الشدات=ولا في الرخا لاشك كل الرجال جبال
هذا مطلع ابيات القصيده وماهو آت =تفاصيل تبغي صبر منكم وطوله بال
بحط النقط من فوق الاحرف وجيب ابيات = من اقصى الضماير صافيات كما الشلال
هدفها هدف سامي وتحمل عبر وعظات =تخص وتعم وتشمل الشيب والاجيال
ومن شان ماجي في متاهات وشكالات = وخلي على شعري لبعض العرب مدخال
ترا القصد من تعميها الفود والحيطات= ولا هي تخص اهل المراجل بدون افعال
وانا شاعر لي منهجي وحسب حسابات=لكل العرب والقاف ماجيب فيه هزال
اصون الشعر ورفع مقامه عن النزلات=وداريه عن نقادة الهرج والعذال
ولاهرج هروج ماعليها سند وثبات =وهرج بدون ثبات نقص على من قال
لي حقوق ولغيري حقوق علي لزمات= ومن لايقدر مايقدر ولو بريال
والاشعار قول مابنت مجد جت وهبات = من الله حسنها حسن ولا القبيح اذلال
شعور ومشاعر صادقات لها حزات = اذا جات زانت كان ماجات ماتنقال
وطراة القصيد ان فاد ولا جلب راحات =ولابارك الله في قصيد يجيب شكال
وما نلفظه مكتوب حسنه مع السيات =عسى الله يعفو يصلح الحال والاحوال
وترا للظروف احكام والوقت له ميلات =وبعض المواقف تجبر الهجس للطوال
ولا احد يلوم الهاجس ان ضاعت الهقوات=الى طول القيفان ياطيبين الفال
بيوته تدافع غصب وان ردها هيهات= تعود ولو عادت تسبب قلق للبال
لهذا عذروني وان حصل نقص اوخلات= ترانا بشر والكامل الواحد المتعال
مضى الجذب والتمهيد للقاف والجيات =تراها البيوت اللي تهم وعليها القال
والابيات لو طالت فمدام محكومات =تراها تشد العقل وتروق العقال
نعيش بزمان مختلف عن زمان فات=به العولمه عمت وطمت وجت بخبال
وعلى رغم ماجتبه من اضرار مختلفات =لزوم نسايرها ولكن بدون اخلال
اخلال يخل بديننا ينقص الطاعات= ويقضي على تراث مشرف قديم وتال
من اسبابها بعض العرب رزوا الرايات= وحطولهم مجد مزيف وقدر عال
يحسبون نيل المجد كتب على الشات =وتمجيد ذات ومدح جد ورزة خال
عسى الله يصلح حالهم يرحم الاموات= وتخشر معاهم في المراجل كرام سبال!!
ولا هم خذوها كلها مابها شكات !!=حسب ظنهم واقوال ماترجح الميزان
يقولون قول يسلب العقل والنظرات= على النت ولا في اتصال على الجوال
ايلين اثروا بهروجهم وكسبو شهرات =بصوله وجوله في المواقع وفي المحفال
يبون المراجل بالحكايا وهي صعبات=عليهم عسيره لو بغوها فلا تنطال
ترا المرجله والعز والمجد والطالات =مكفين عنها وتركوها لهن جمال
تبي تضحيات وجهد وفعال مشهودات=ولاكم خسرت وكم تبقى من الاموال
ورجل طليق حجاج ينفق لها بسكات= يقول ويطول ولا التفت للمديح ومال
ماهي بالتمني والترزز وبكتابات=ولابالهروج اللي تلمع ونظم امثال
ولا ارحب تراحيب المطر وبرك الساعات= ونعم وقرم ونشمي وبن عم غال
وشرفتنا لاهنت ياشاعر الجزلات =وصح الله السانك على الجزل وهو حثال
وحنا الذين مااحد مثلنا سادات=وحن عون من حده زمانه وجار ومال
وش اقول وخلي من هروج راحت جات =خليه من الواقع مليه خيال عيال
السنة فصيحه والعبارات معسولات= والاجسام تلمع مثل لمعة سراب اللال
الى شافها الضميان يفرح وهي لمعات=تبارق على الخالي بصحصاح فج خال
خذو حذركم ياايها الناس من رزات = ترزز على الشاشات وان صك جال جال
تطيح اقنعتهم ساعة الضيق والوقفات= وتكشف وجيه الزيف ومجادهم تنهال
يحسبون ماللوقت شده ولا دورات= ومن ادناة هزه بينت ماحوت لاشكال
لاحد ينخدع والحر تكفيه تلميحات= يراجع حساباته ويفهم بدون جدال
وانا قلت من واقع ودزيت برقيات= بليا عناوين تصل للعرب في الحال
وبعض المواقف لو قست وجلبت ضيقات=تراها تفيد الرجل والله لهاحلال
ودنيا ال بن ادم فانيه والعمر فترات= وصكات بقعا لانوتت جات دون مهال
ياكم طيب متعافي مهتني بسبات=ويصبح مريض لو بغى المشي مايحتال
ياكم غافل داله وغرقان في اللذات=تفاجيه وتخلي حياته شقى وحمال
تقلب وفي لحظه تخلي الفرح ضيقات= بقاها على حال على طول هذا محال
ومن زان وقته شان لا يضمنه لحظات= كذا طبعها والناس نازل وذا رحال
ياربح الذي لامات كنه بقى ما مات= وذكره يخلد والولي وسع المنزال