لوحسبت الارض..والكـون بمعمّـه=قيمة القطب الجنوبـي .. والشمالـي
ماتساوي ريح عطرك .. يـوم اشمّـه=ياحبيبٍ مشغـلٍ فكـري .. وبالـي
انت لامن جيت للناقـص .. تتمّـه=كامـلٍ زينـك .. ولله الكمـالـي
ودي اوصفك .. بس الوصف ذمّـه=ماخبرنا واقعي .. يوصـف خيالـي
بك (لسانٍ) يخطي الحكـي ويخمّـه=والحروف تقـول دوّرلـك بدالـي
و(النواعس) .. كالليـال المدلهمّـه=(وغرتك) .. تكشف مجاهيم الليالـي
و(اسودٍ) .. لامـن نثرتـه ماتلمّـه=غيـر بالكـف اليميـن وبالشمالـي
و(عودٍ) اطرق لاتمايل .. ملـت يمّـه=بري حالي لاتمايـل .. بـري حالـي
ودي اشدّه على صدري .. واضمّـه=انحني لك غصب .. لو الراس عالـي
انت قمه .. كان بـه للزيـن قمّـه=وانت الاوّل .. كان به للزيـن تالـي
لو يشكّل للمزيّن .. (مجلـس امّـه)=كان ماجا للبنـيّ .. غيـرك مجالـي
انت خال الزين كله .. وانت عمّـه=وصرت في دنيا الهوى عمي وخالـي
منك شري لانخرعت وقلت (( يمّه))=يحفظك من شـرف العشـر التوالـي
عاشقـك كـان الرياضـه ماتهمّـه=شفتك تشجع .. وضيّعت اعتدالـي
قمت اطالع فالصوّر .. من كل يمّـه=انت وجهني .. وانـا افـرغ هبالـي
كانك تشجـع نصـر .. اروح يمّـه=وكانك تشجع هلال .. اطلع هلالـي
بـس لايبطـي ضمـا وراد جـمّـه=اروني ياجمي .. العـذب .. الزلالـي
مثـل ماعيفتنـي كـل (الازمـه))=والله ان اعيّفك كـل ((الرجالـي))
انت ابو قرب الحبايب .. وانت سمّـه=وابرك الساعات .. ((جوّك لاصفالي))