الزمن ما يهزم الرجل والدنيا نصيب = والثمينة غالية والليالي تجربه
والوفا ضد الغدر والصحيب مع الصحيب= ومن يصارع بيض الأيام لازم تنكبه
الكابه والحزن ما يعالجها طبيب= والسعاده لو هي بعير بكره نشعبه
شاعرن جرحه من الوقت والدنيا عطيب =حاول انه ينهب الوقت والوقت انهبه
والمذله والمهونه على الرجال عيب= والخطا مافيه رجال عاقل يرغبه
والكلااام الزين يخلص طليبن من طليب = والرجل يبقى طموحه معلق بشنبه
قادني للعشق دربن على العاذل صعيب = وحثني لشوق درسن عجزت استوعبه
واحدن في نظرته تبدي الشمس وتغيب = حد قلبي يم قلبه وساقه واغصبه
يسلب أعيون المخاليق بالرمش الغريب = ويفتن العالم بعقله وزينه وأدبه
رمش عينه يطرد الخووف والليل الكئيب = وكثر صمته يستفز الكلااام ويغلبه
من عيونه يفرض السلم بعيوون الحريب = موهبه من مالك الملك واحلى موهبه
يجذب اللي ما دخل فيه لاشكن وريب = يجذبه وشلون مدري ولكن يجذبه !
ان طلبته ما بخل وان مسك جرحي يطيب = وان طلبني لو يبا النجم لبيت اطلبه
وان بدى لناس غنت طيور العندليب = وان تخفاا واختفا تنشد النااس اعربه
يا حبيبي شاعرك طاح قدامك صويب =آه من سهمن تعلق بصدره وأعطبه
كان يحلم بالسعادة وحلمه مايصيب= لين صار الحلم كذبه ونارك تلهبه
اسمك أبقلبي بنا عرش حب وعهد طيب =يا عساي الموت كاني تجرات اشطبه
انت زينك صبحن ابيض ونورن مايغيب = الله اللي سجل الزين بسمك واكتبه
الخجل كنه نهب كبريا صمتك نهيب= والبراءه كنها ضيف وانت امعزبه
انت مثل السيل لاسال مع بطن الشعيب= من يمره مانتبه غصب عنه ينتبه
ايه احبك واعترف للبعيد وللقريب= ايه والدنيا بدونك بعيني مرعبه
اقتنعت ان الزمن جرح والدنيا نصيب= والثمينة غالية والليالي تجربه[/SIZE]