حسب الوعد ياعميلي بانتظر والوعد للحر دين = شرواك حلالها شرواك حلالها
والطيب عادة هل الطولات يابن الجود ذرب اليمين=مشروبك إزلالها مشروبك إزلالها
والمدح مايذكر الا بالرجال الاوفياء والطيبين= يعطونك اجزالها يعطونك اجزالها
والظرف يشكا على منهو يقدر شكوة المشتكين=للصعبه ارجالها للصعبه ارجالها
والعلم يعرض على اهل العلم واهل العرف والفاهمين=للسوق دلالها للسوق دلالها
قلبي يحب الكريم ابن الكرام ويكره الخايبين= الذل يبرالها الذل يبرالها
والرجل لابد مايتبع سلوم اجداده الاولين= شياله اثقالها شياله اثقالها
أقولها من تجارب ياعميل الخير ذيك السنين= بقفاي واقبالها بقفاي واقبالها
ياكثر ربع الرخاء اللي بالشدايد تختفي ماتبين== قصيرة احبالها قصيرة احبالها
مما حصل لي معا سود الليالي صار عندي يقين= الناس بافعالها الناس بافعالها
واليوم وقتك تغير زاد فيه الماي فوق الطحين= ماقيس مكيالها ماقيس مكيالها
لا واعذابي عجزت القا صديق صادق لي أمين= وأكفيه بهوالها واكفيه بهوالها
محتار واحترت في دنيا تحير كل عقل ذهين=محتار في حالها محتار في حالها
عجزت لافهم تقلاب الزمن لو كان عقلي فطين= تخدعك بمهالها تخدعك بمهالها
بعض الخلايق تغر وتخدع الجاهل بها كل حين= تغر بأزوالها تغر بأزوالها
بعض العرب تخدعك بثياب مضهرها جميل حسين= والعيب باسمالها والعيب باسمالها
وبعض العرب تركب اشداد ماهوب اشداد فيه سين= وتّزور اقوالها وتّزور اقوالها
والشعر بحراً يضيع من سبح به كود بخص مكين= دانه ويالالها دانه ويالالها
الموهبه هي مطيه شاعرالميدان وهي الظمين= لا جاد موالها لا جاد موالها
ماكل من قال له بيتين سمي شاعر الفرقدين= ترشدك عقالها ترشدك عقالها
السرج فوق البقر قد قيل مايصلح ولاهوب زين= خلها على اشكالها خلها على اشكالها
الاوله واضحه والثانيه معنى ورمز دفين= للخيل خيالها للخيل خيالها
يالله توفق بقايا رحله ايام العمر يامعين= وتحقق آمالها وتحقق آمالها
اسئلك حقق رجاه وغايته يارب دنيا ودين= يامعطي افضالها يامعطي افضالها
الله رجاء كل نفس مؤمنه وانت الملاذ الحصين= لاوزنت اعمالها لاوزنت اعمالها