تجيني طيف يا عمري على جنحان شوقي لك = أخاف أرمش من عيوني وأبعثر جيّة وصالك
حبيبي لا تجيني .. قول وين أنت وأنا أجي لك = أبيك تقول وين أنت وعلى عيوني أنا أسعالك
وربي فوق روس الشوك لخلي القلب يمشي لك = وأخلي ظلالي يسبقني قبل يحضني منزالك
ثواني بس أبتهندم من عيونك وأبهدي لك = في عينك ضحكة حتى تكحل عين عذالك
يقولوا الناس في غيابي تشب القلب ويضوي لك = حنيني ومن وهج شوقه يميل القلب لا مالك
قضى دمعي من عيوني أبي من عينك أبكي لك = أبنثر من ورى عيوني دموع عيون ترحالك
تعبت أهرب من الأشيا البسيطة من تفاصيلك = تعبت أسأل زوايا البيت عن أول وآخر أحوالك
وحتى الشوق من صبح الدرايش قام يهدي لك = عصافير الرضا ترفرف على بيبان مدخالك
هنا ترمي صباح الخير قبل لا تروح وادعي لك = وهنا تضوي مساء الخير في عيني من هلالك
أنا من الليل يقطفني شعوري لك وأغني لك = أنا من الصبح يليلني الحزن من لون موالك
حرام الليل ماهو ليل إذا ما كنت في ليلك = وحرام الصبح ماهو صبح اذا ما كنت بظلالك
تروح وقلت أحط روحي على كفي ونادي لك = نزعت العمر من شفت الغلا بالروح نادالك
بربك قول وش سوى الفراق بوجه منديلك = تسيل ألوان طيفي فيه إلا من البكا سالك
حبيبي لا يبكيك الفراق ولا يهد حيلك = أخاف الدمع من عينك يجفف صورتي ببالك
تعال أحتاج أسولفلك عن الأيام وأشكي لك = وأفض غيم الحزن وأنثر حنين الشوق بقبالك
تعال وحط في قلبي هموم الفرقا وأشيلك = لأن القلب ماهو قلب إذا في نبضه ما شالك
وقف دمعي من عيوني أبي من عينك أبكي لك = أخاف أبكي من عيوني وأبعثر جيّة وصالك !