الصدر زنزانة أدب والخافق اسير = والفكر عيّن للسان استشاري
والشعر ساحة حرب والشاعر مْغير = والقاف ذود وتحتميه الشباري
ولا يحصل حصته وافيه غير : = ( شوق العذارى لا بسات الخزاري )
وراسي معزب والطواري مسايير = يا مرحبا لبيه يا اغلى الطواري
تلفي علي وافز واصيح واشير = على كرامتها واقلّط فقاري
واشب ضو القاف وتشع وتنير = وتبحص معانيّه بجوف الغواري
وازلّها وسط الدلال المباهير = وامد فنجال الجزال الهراري
مثايلٍ فيها اعجاز وتصاوير = لزّم اتنقاها بحسّب اختياري
مثل الرفيق اللي يدوّر لي الخير = ويزعل علي لو يوم شاف انحداري
وادوّر لبعض السوالف معاذير = واحط لي منهج واحدد مساري
واحرص على نسل الرجال المناعير = اللي يماري بخوته لي واماري
فقير يحفظ لي وقاري ولا امير = يحط من قدري ويضيع وقاري
ابيه لا دارت علي الدواوير = يكون لي عزوة وجبر انكساري
خوة شرف ماهيب خوة دنانير = وان غبت ما يرضى علي الهذاري
يا ملّ عينٍ تحبس الدمع ويحير = ويحدها عن الدموع اعتباري
كن في حشاي من الغبينه دوافير = وتحوفني في كل ساعه عزاري
إلى ذكرت الحظ فالثلث الأخير = وحبٍ عجزت اقدم إْلِه اعتذاري
تعبت من طول السهر والمشاوير = ومن كثر ماحطت بعيني مواري
وازريت للقى للمواجع تفاسير = وعانيت من كبت الحزن والعباري
وسيلٍ من النكبات مامنّه مْجير = لا صرت اداري والغلا ما يداري
هقيت في وقتٍ هدرّ كنّه بْعير = وضاعت هقاويي وطال انتظاري
ان جيت طمعٍ في ليالٍ مغاتير = جتني مجاهيمه هزال وعواري
لكنّ ابسألكم احد شاف لي طير ؟ = خلا ضلوعي واخلِفتْه الحباري
قمت ازهمه والوّح بغترتي مير = روّح وقفت به هبوب الذواري
واصبحت مالي قلب يَروى من البير = من يوم ما شحّت بماها عذاري

واحرص على نسل الرجال المناعير=اللي يماري بخوتـه لـي وامـاري
فقير يحفظ لـي وقـاري ولا اميـر=يحط من قـدري ويضيـع وقـاري
ابيـه لا دارت عـلـي الـدواويـر=يكون لي عـزوة وجبـر انكسـاري
خوة شرف ماهيـب خـوة دنانيـر=وان غبت ما يرضى علي الهـذاري

فقير يحفظ لـي وقـاري ولا اميـر = يحط من قـدري ويضيـع وقـاري