سلام الله سلام معطرٍ بالمسك والريحان = على الاول على الثاني على الثالث على الرابع
سلامٍ ما يخص الا يا كود أهل الفخر والشأن = رجال الطيب اللي للمراجل دايم تصارع
أحب أجلس مع الطيب وأحب مجالس الشجعان = وفي خوة خبيث الطبع لا والله ماني طامع
وأصاحب صاحبٍ صحبته مكسب ماهي بخسران = وراعي الطيب أنا لخوته شاري ماني ببايع
وأحب اللي ليا من قال قوله يرضي الزعلان = ما هو يأتي لنا بقوال ما يدري بها الضايع
ما هو ينقل لنا الاقوال لا ثباتٍ ولا برهان = ليا قالوا له العربان صحيح ؟ قال أنا سامع
ولا أحب أجزي الاحسان غير بمثله بإحسان = وباللي كاتبه ربي عليه راضي وقانع
وأحب أشرب من الدله وخصٍ دلة الرسلان = لها لونٍ كما لون الذهب دايم وهو لامع
وأحب الابل وشوف الابل وأحب أمشي مع الرعيان = هذي مجهم هذي وضحى وهذي لونها رايع
وأحب الشعر وأهل الشعر اللي صيتهم رنان = هل الطالات وأهل الطيب اللي مجدهم ذايع
وأحب أبدع جزال الشعر وأبدع زينة القيفان = بيوتٍ تدهش القارئ بيوتٍ تطرب السامع
وأنا ما شاقني يا كود تركي شاعر المطران = وولد الذيب وابن حميد وأحمد ناصر الشايع
وأبن علوش عبدالله ومعه الهاجري سلطان = و من هو يكتب الجزلات أنا دايم له متابع
ألا يا الله طلبت الله طلبت الواحد المنان = طلبته طلبة الساجد طلبته طلبة الراكع
طلبته يغفر ذنوبي طلبته عفوه وغفران = إله الكون رب الناس مدبر رزق للجايع