ياالله ياعالم خفيات الأسرار=يا واحد كل الخلايق عبيده
يارب يا رحمن يا المغني البار=يا منتهى كل الامور البعيده
ياملتجا الخايف من الحر والنار=يامنتجا من عاذ به من وعيده
ياثالث ثنينٍ تشرف بهم غار=يا ناصرٍ عبده وجنده شهيده
شاعر وخيال القوافي و الاشعار=ذبح القوافي عادتي والشريده
يشوقني بدع المثايل ولا احتار=محافظة وادي الدواسر قصيده
سلامٍ احلى من لبن در الابكار=لك يالوكيل ازكى التحايا عديده
ولـ أصحاب السعاده والرياسه وخطار=والي بعد غايب بتاصل بريده
ياصل سلامي والرساله والاخبار=في منتدى الوادي عسى الله يزيده
ولهلي هل الطالات ودّاية الجار=عيد القصيد الي تفاخر فريده
ماجيت اغني فوق الاطلال تذكار=ولا جيت اعدد مجدهم في نشيده
جيت اتفكر وافتكر بالذي صار=بالي نريد وبالذي ما نريده
انخى الدواسر عزوتي صغار وكبار=ياسعد من صرتوا نباه ورفيده
تكفون يالزايديه يا الاحرار=اعيادنا واعراسنا في وقيده
تقول في الفلوجه اهتزت ديار=شب السما بارود برق ورعيده
خافوا من الله قبل قصّاف الاعمار=من سن سنه سيئه في رصيده
كم فاجعه جتنا بلا سابق انذار= ماتنفع الاعذار من طاش حيده
اصل الجروح قصاص يامحيي الثار=تفكروا في ما مضى وش مفيده
لاهيب بالسنه ولا عندنا اخطار=الحمدلله والحكومه رشيده
ما مثلنا والله في كل الامصار=أمن وأمان وغيرنا في طريده
حكامنا وملوكنا صفوة أخيار=من عهد بو تركي إلين الوليده
عبد الله الي شرف الله به الدار=عيد القلوب الي تحبه وعيده
خادم بيوت الله والسيف بتار=إستأصل الارهاب واهل المكيده
وسلطان عضده طير حاران لاغار=يدمي عدو الدين من قبل صيده
وامير نجد ابو فهد وافي أشبار= سلمان يبقى بيرق العز بيده
وختامها صلى الله على من هو إختار=الهادي المعصوم صفوة عبيده

الشاعر الفذ والأخ الغالي : مجمد بن فراج

صح الله لسانك وبيض الله وجهك على هالقصيدة الجميلة

دمت مبدعاً كما عهدناك والله يحفظك ويرعاك