تباشروا يهل النقا بمنقع الجود = يهل الفخر والمرجله والشكاله
فزتوا بشيخ ماوطا درب منقود = قدم لكم نفسه وجاهه و ماله
و لصالح المطرودي موقف و مشهود = النادر الى تارد ألما حباله
لدرب المراجل باذل كل مجهود = وكل ينعم له إلى جاء مجاله
حفيد من فعله براهين وشهود = ورد على عد المراجل رحاله
عضو الشرف وانتم لمن مثله عضود = أولاد عم وكلكم من سلاله
في مجلس دايم مع الطيب ما عود = من ماكر رسم الكرم به دلاله
مدو هل المدا براهين و عهود = كل نهل جمام المعالي وعنا له
وكل الحمايل ما على فعلهم زود = فيهم هل الطولات أهل الجماله
تسابقوا لجله جماعات ووفود = وبيت العداله ما يدور بداله
ودام الأمل في راعي الجود معقود = بعد الولي ما خاب منهو عناله
لهل الشماسية مقام ومحمود = وكبارهم أهل المروه خواله
خواله الحماد أشبال وفهود = هم راسنا و الراس ترسي جباله
أولاد سابق لاغشا الجو بارود = كم واحد شال الحمل و ارتكاله
سلة سيوف بالقا تنطح الكود = أهل الشرف والدين وبيت الجماله
تاريخهم في صفحت المجد مرصود = مشيدين الدار حامين جاله
دار لها تاريخ و امجاد و حدود = يلقا الندى كل من تفيا ظلاله
مدوا على المدا مقاصير وجنود = كم عايل جدواه يرعى خياله
و الفرق بالموقف إلى صاح مضهود = فعل يحد الشيخ يرمى عقاله
و اخبارهم في عقبهم دوم و تعود = نشوفها كنا جلسنا قباله
و الطيب من عشاقة الطيب مارود = و كل على جهده ينول الجزاله
تحية أطيب من المسك والعود = و احلا من الماء لا تدريق زلاله
الى اجتمعتوا صرتوا ارسى من الطود = لو تنبت خشوم الرعن في ظلاله
و اليوم جتنا برضا سهود و مهود = الكل يقري الضيف من فيض ماله
بظلال حكام على شعبهم جود = يمدهم بالعون رب الجلاله
و صلاة ربي عد ما حنت رعود = على نبي زال عنا الظلاله