يا سعيد اركب وعرضه السمومي=ماتعودنا على برد الاضله
عرضه حدب الريادي والحزومي=وسهج اللاهوب خل النوم خله
ماينام الا قليلين الهمومي=كل خبل كثر نومه عادةٍ له
سرحه ياسعيد من دار القرومي=وانت سواقه ومنهاجك تدله
سرحه من دار ذربين السلومي=دار ابو سحمي مداوي كل عله
شايبٍ شيب على طيب العلومي=ومن شبابه والرجوله منهج ٍ له
والسبوع اللي خذينا كنه يومي=ومن تعمق في طبوعه مايمله
ونقضا من عندهم بعض اللزومي=ومابقا ياسعيد جعله فدوة ٍ له

يافليح الفلح يافلح العزومي=المهم انه فليح الراي كله
قرب اللي مستعد ٍ ومحشومي=مع طلوع الشمس واركب واعتدل له
نحره دار ابو خالد يامغنومي=عند راشد مقعده فإنه هل ٍ له
لالفيت ابن عويضه بالعلومي=وبسلامي والخبر دقه وجله
حبلي خشمه عسى عمره يدومي=عد مابيني وبينه حشمة ٍ له
مرحباً برسالته عد النجومي=وعد وبل ٍ من مخاييله تهله
واللة ان اذكره حتى في الحلومي=ون خياله ثابت ٍ لي في محله
جعل يفدونه دهاديه الهزومي=والبخيل اللي غناته حسرة ٍ له
واللة ان طب الحسايس الحثومي=رفقة اللي كل طيبٍ يرتحل له
ماتغوي به برابيس الرخومي=يابس ٍ راسه ورايه معتدل له