الله خلقنا من تراب .. وجينا = وسقنا على وجه الوطا رجلينا
سقنا مع الدرب الطويل خْطانا = ويالله .. من داب الدجى تنجينا
(( ادروبنا ..بأقدامنا نطويها = وايامنا .. بأقدامها تطوينا ))
وفي كل يوم .. اركابنا نشعبها = للمقبلات آمالنا تغرينا
إليا مشت بالهون .. نزعل منها ! = وان درهمت .. بأضهورها غنينا !!
النفس في حب العجل مولاعه = ما ندري ان درهامها يدنينا !؟
من ديرة .. سكانها في عزله = ما احد ٍ يرد الصوووت .. لا نادينا
معهم لنا .. بيت ٍ ظلامه موحش = ارضه ، وجدرانه , وسقفه .. طينا
ما عنّ ( ديّان المنيّه ) صدّه = لابد حنّا نجيه .. ولا يجينا
والعزّ .. فرصة عمر ما تنعاضي = إليا تعدت .. ما تعود إلينا
ما فاز في لذّات الأيام .. إلا !؟ = مغامري ٍ يجمع الثنتينا
قلب ٍ شجاع ٍ ساطي ٍ متجرّي = وفكر ٍ ليا ضاع الذهين .. اذهينا
ومزاحم ازحول الرجال يشرّف = العزّ .. حاصل في كلآ الحالينا
أما / كسبنا منوة المتمنّي = ( سيف ٍ ) نجوّد سلته بإيدينا
ولا / ذِكِرنا بوسمنا وآسمانا = ذِكر ٍ يخلد .. والذِكر يحيينا
ومسابقه بأسم ( السديري محمد ) = ما فيه عذر ٍ دونها يعفينا !؟
مادامها بأسم الأمير الراحل = شاركت و ( ابو زيد ) منّا .. وفينا
متسلسل ٍ من راس ( ابن بدراني ) = ( عامر ) ضمين .. الضيف والعانينا
شيخ ليا نادى المنادي .. لبّى = وحنّا ليا منه دعى .. لبّينا
من لابة ٍ .. يا حيّها من لابه = ما تنجب الا كل ( خطل إيمينا )
اصيلة ٍ من بطنها ما يولد = إلا .. الأصيل معرب الجدينا
(( دواسر ٍ )) فالحرب .. موت ٍ سابح = وفالسلم .. عد ٍّ يروي الضامينا
يامآلنا من موقف ٍ نفخر به = يحكي به الأول ,, على التالينا
وحنا بــ( ابوزيد ) المسمى نفخر = ويفخر به الأدنين .. والقاصينا
حر ٍ .. كفخ من عش حر ٍ نادر = غَذَّى .. و غِذِّي .. ونومس الغاذينا
فصيلته .. ( فارس , وأمير , وشاعر ) = أطيب ( ثلاث ) لما بقى تنبينا
أبو .. العلوم الغانمات .. وعمّها = وخال .. الملوك اللي لهم والينا
آل السعود .. اخوان من طاع الله = أخوان نوره .. مزبن الجالينا
وعطيته لوحة شرف ما تمحى = عطية الاموات .. للحييّنا
وحقه علينا نطلب إلْه الرحمه = حق ٍ على الحييّن .. للفانينا
لعلّ قبره من رياض الجنه = أنهار , وأثمار ٍ , و حور ٍ عِينا
ومن لا تعلم من حياة ( محمد ) = يامآل .. ثم يآمال .. فرقى العينا
من عاش ما جاء له علوم ٍ تذكر = إليا أختفى راسه .. ما عاد يبينا !
الهيكل .. اللي ما يحرك ساكن = يصبر على ما جاه زين .. وشينا
ما يستوي ( الزحزوح ) .. و المتزحزح = فرقهم اللي فرّق البحرينا
الكل يخلق له مكان ومنزل = من خلقة الدنيا .. ليا ذا الحينا
ما للجمل .. فالبحر زول وجرّه = وما للبواخر .. فالصحاري مينا

يا طير .. يا طير .. يا طير السعد ياللـي تـرف الجنـاح = لا واهنيـك ليـا ضاقـت عليـك الارض خليتـهـا
وان رحت وان جيت ياطير السعد تسبق هبوب الرياح = واظن ما فيه ديره فـوق وجـه الارض مـا جيتهـا
مانته بمثلي تجي وتروح ما يصعب عليـك المـراح = لكـن ياليـت جنحانـك معـي يـا طيـر ياليتـهـا
كله على شان ازور اللي رمانـي بالعنـا واستـراح = اللـي علـى شانـه الاقـدام عنتـنـي وعنيتـهـا
في ماضي الايام اشوفه قدم عيني في المسا والصباح = واليوم حتى العلوم اللي تجينـي عنـه مـا اوحيتهـا
وليا نشدت العرب ماحـد يعلمنـي عنـه ويـن راح = واتعبـت نفسـي وبالنشـده كثيـر النـاس بذيتهـا
لا ووجودي علـى شوفتـك مـره ياظبـي البـراح = ياللي على شانـك العبـره علـى الخديـن هليتهـا
يابو عيون هدبهـا يـزرق العشـاق زرق الرمـاح= ذبحت روحي على كفـك برمـش العيـن واحييتهـا

يا طير .. يا طير .. يا طير السعد ياللي تسمى ( فلاح ) = يا حلو جنحانك اللي فوق متن الجوّ فليتها
ان تاق صدرك تصف الريش يا طير وتشوف الفياح = و أنا على الأرض ، تاق الصدر لكن ما تعديتها !!
يا طير ما تأخذ اعلومي لـ خلّي كود تبرى الجراح = و تكسب علشاني الأجر العظيم ان كان وديتها
قل له : ترى البعد عنّه حط فوق الكبد ، سمٍّ ذحاح = و قل له : تراني علشانه نجوم الليل عديتها !!
من اول ٍ فالهوى ماغير انا ويـّـاه ضحك و مزاح = واليوم من دونه سباع القرى يا طول تصويتها
واليا اذكروه العباد ، اسمع لـ قلبي في ضلوعي صياح = ثم جبت ونـّـه ، على ونـّـه ، على ونـّـه .. و جريتها
ما ردني دونه الا الحظ .. حظي كل ما قام طاح !!= وش فيك يا حظ لا جتني علوم الخير لديتها ؟
و أكتم على قصتي يا طير بين الناس .. حذرا تباح = قصة غرامي ترى ماغير لك يا طير قصيتها