يابنت بعد الستر صْرتي تعــّرين = لاهوب ذا فرض ولا هوب سنـّـه

لاتلــبسي العلاّق يابنت تكفين = امك مع امي قبـــلنا مالبسنـّه

كانــك بتقليد الخواجه تبــاهين=وراك يـوم الحشر نـــــــارٍ وجنــّـه

وان كان ذي موضـه ! تراكن مساكين = الكــافرات لباسهن تلبسنـّـه

لبــسٍ (ن) عليكــن مثـل لبس المجانين=متقطّـع حتى الظــهر بان منـّه

الكاســـيات العــاريات (......)=ياويــــلهن مــــن شــي بيواجـــهنـّـه
جداتـــنا باقــي صداهـن لهالحين =الكــــم لا منه قصـــر طـــولــنـّـه

لا ما لبسن لبــسة "ديانا ونادين"= والســاق مثل "كلوديا" ماكشفنـّـه
ترى الحـلا ماهو بكشف الكراعين = ولا هو بكشف الصـدر ياللي تبنـّـه
ترى الحــلا بالستر بس الستر ويـن=دام اللبــاس الفــــاضح تؤيـدنـّـه

لاشفتهــن بالعرس مثل الشياطين =حتى الشعــر فـوق الاذان جْـبَعَنـّه

ماالــوم انا من عندها نقص بالدين =ألـــــوم زوج خـــيـّب الله ظــــنـّـه

مشي وراهــا مثل مشي البعارين=لمطـــارد الموضــه معاها تقنـّــه

وليــا نصحها قالت: اسكت وبعدين=وإن ما سكت من كف يدها تصنـّه

غصـــبٍ عليه .. الحُبّ فوق القوانين=لاتحــــترم رايه ولاَتخـــاف مــنـّه

الجَيب فـــــاضي بعْد جمْع الملايين=بنــــات حَــــوّا ضاعــــن وضيّعَنّه