بسم الله الرحمن الرحيم
مساكم الله بالخير جميع
هذي قصيدة قالها الشاعر الكبير : أحمد الناصر الشايع المسعري .. وهي في رثاء ابنه فهد - رحمه الله - والذي توفي في حادث سيارة على طريق الرياض - مكة بين محافظتي (الخاصرة) و(حلبان)
وقد ذكر هذا في قصيدته .. وذكر أيضا وفاة الأمير محمد بن عبد العزيز ..
وهذي القصيدة بصراحة من أفضل ما قيل في الرثاء .. ومن سمعها بصوت الشاعر لابد أن يتأثر ..
اضغط هنا لسماع القصيدة بصوت الشاعر
يقول فيها ::
نهار ثالث عقـب عيـد رمضانـي=ناس ٍعطاها الله وناس محرومه
أحدٍ قضى عيده سلام وتهانـي=وأحدٍ توصله الكواكـب همومـه
صادفت صدفه من صدوف الزماني=منها قوّي الحيـل تفتـر عزومـه
هـذا زمـان الهـم والامتحـانـي=وقتٍ على قلبـي تعاقـب سهومـه
الأولـه كامـل جميـع المعـانـي=مزبن المضيوم شرع الخصومه
(محمـد) اللـي بالقسـا والليـانـي=عقبـه سمايـه غايبـاتٍ نجومـه
والثانية بأقرب قريـبٍ ودانـي=خامس عيالي يوم جتنـي علومـه
قالوا ما بين (الخاصرة وحلبانـي)=ولدك مـات اللـي ترجـا قدومـه
جا يومه الموعود بأربـع ثوانـي=قلت السبب؟ قالوا دنا منـه يومـه
علم ٍعلى الكبد الصخيفـه كوانـي=كيـة عطـب ماتنشكـي للحكومـه
تهشمت كـل الضلـوع المحانـي=مفجوع والمفجوع محدٍ يلومـه
أخذت لي ساعة وأنا فـي مكانـي=حسبت لي عشرين طيحه وقومـه
إلى بغيت الهـرج ييبـس لسانـي=والذاكرة عنـدي تقـول معدومـه
قمـت أتلفـت وأتسمّـع بأذانـي=من شاف حالـي ماتهنـا بنومـه
مما بقلبي رحت بالليـل عانـي=للموتر اللـي مابقـى إلا رسومـه
عن روحتي ياليـت ربـي نهانـي=ولا شفت دمه سايح ٍفـي هدومـه
قمـت ودفنتـه والله المستعـانـي=في خرقة ٍ بيضاء عليـه محزومـه
يـم القويعيـه بـلاد قحطـانـي=والحر غير لون وجهـي سمومـه
وأقفيت من عنده وعشري ثمانـي=مثل المِصبـح والبـلاد محكومـه
والله يا لولا إني وسيـع البطانـي=لا أصكها مثل أشقر الريش حومـه
طاوعت نفسي مير عقلـي قوانـي=عن الخطا مافيه نفس معصومـه
تحياتي ،،،