راااائعة من روائع الشاعر / سليمان الهويدي
عشــقت القــمر حـيث القمر ينبعث به نـور = واخــص اللــيالي البيض تـزهاه ويزهنه
واحــب الــهوى لاهـب مـن خايع ٍ ممــــطور = وريح النــفل حــيث النفل طــيب الخنه
واحب الجمــاله والــجماله عـــمل مبـــــرور = واحب الغــناه وعــز نفسي مــن المنه
واحب الصـــراحه والصــراحه بـها مـــــسرور = حيث ان الصراحه تقطع الشك والظنه
واحـب الكــريم اللــي يفــرج عن المعسور = اليا من عطى حتى هله ما دروا عنه
واحب الــرجال العــارفه واكــره المــــــــغرور = من اغتر في بعض المــواقف يغـــــرنه
سقى الله ليــالٍ ماضــيه قبل هدم السور = نحفر العدود ونشرب الماء من الشنه
نشــوف الــبنات الـيا وردن كــنهن الحـــور = أمــهار ٍ مــشاويل ٍ بالاعـــياد معـــتنه
على المــاء تشــوف بــيوتهم كنهن القور = كــثير القــبايل تقــطن العـد بالكــــنه
على البـــال ذكراها يالـيت اللــيالي تدور = ياليت اللــــيالي ما خـــذنه يـــجيبنه
تذكــــرت شـــيبان ٍ لنا يـــوم حنا بـــــزور = يحثــوننا للـــطيب والفرض والــــسنه
وعاشوا حيــاة ٍ قاســـيه في بـــحر وبرور = عسى الله يعــوضهم بما فات بالجنه
ودور ٍ مــضى من بينهـم ويــن هاك الدور = زمانٍ مضـــى له ذكـــرياتٍ يحـــــــلنه
يوم ان الـذهب ما يلـبسونه بدون خصور = وجمال النسا ماهو من السوق يشرنه
فقدنا حياة البــــدو مع شـــوفة المظهور = ولا عاد به بدو ٍ ... ولا الطرش له حنه