[معلومات العضو نايف بن مسرع]

الزمان: مساء الخميس 1/1/1429هـ

المكان: الفحيحيل ( الكويت )

المناسبة:( ملتقى القبيلة الثالث )

*

*
*
*
*

مافيه شك إن كل رجل لسانه=لاجت مواقيف الرجال حصانه
كلن تجي الابيات من منظوره=والمستمع قدامها بآذانه
شاعر له الجمهور يسمع منصت=وأهل الجزيل تقول: صح لسانه
وشاعر يجي ويروح محدن يمه=ماله لزوم ولالشعره خانه
السوق حامي والبضايع واجد=بس الذهب يفرق بزود أثمانه
والتاجر اللي مايجيب الغالي=ليته قعد وارتاح في دكانه
الشعر ديوان العرب من مبطي=لكن وضعه في زمنــّا هانه
أول مع الفرّيس واهل الحكمة=فرايدٍ لايومنا رنانه
واليوم موضه من حساب الموضه=عاثوا بعرشه قوم يالادانه
وظيفة اللي مالقى له شغلة=كلن على ليلاه جرّ ألحانه
وأكيد ماللذوق وأهله حاجة=في بيت شعر(ن) ماتعز أركانه
وقصيدة(ن) تنظم بليا معنى=سحاب صيف(ن) ماتخال أمزانه
وفي ليلة(ن) رفعت راسي فيها=اخترت من سوق القصيد اسمانه
نوادر(ن) ماسقتها لسواكم=يامستقر الطيب ياشيخانه
نوادر(ن) باسم الدواسر توسم=وبأذكارهم وامجادهم مزدانه
من شاعر(ن) لااستل كلن شعره=الخيل خيله والسنان سنانه
اليوم خيل الشعر له روضها=وأمس(ن) تهاب الخيل من جدانه
حقايق(ن) ماهي سوالف مجلس=ياجاهل التاريخ.. عانه...عانه
يقمح صبي(ن) ماوقف موقفهم=ويقمح حفيد الجود لامن خانه
سلام ياهل العز ياهل الهيبة=ياهامة التمجيد ياعنوانه
سلام ياربعي عصابة راسي=يانصرة المضيوم خير أعوانه
يامكرمين الضيف ياعز الخوي=يامهملين الجار ياصـوّانه
دواسر(ن) وسلومنا شاهدنا=....بين الرجال وكل رجال وشانه
دواسر(ن) ماتنحني هامتنا=إلا خضوع لربنا سبحانه
دواسر(ن) لاعال عايل علْنا=ولاذاق سطوتنا لعن شيطانه
وساع(ن) مضاربنا وخطلن يدينا=وياويل منهو حطنا ديانه
حنا هل الهومات ياجاهلنا=سور البلاد موسعة حدانه
تاريخنا مهوب توه يبدا=سبعة قرون تشع في ديوانه
سبعة قرون وكل قرن(ن) شاهد=أرض العرب بامجادنا رويانه
أرض(ن) سكنـّاها ونعم المسكن=ولاهيب ترضى غيرنا سكانه
سيل(ن) تحدر من حدود الوادي=برقه سيوف... وهيجنا ودّانه
حتى ملكنا أغلى المداين عنوة=والمُلك يثبت دامنا سيسانه
لكن: ياهل العز واهل الطالة=وش ينفع الرجال: كانه... كانه
من كان ورثه من جدوده ثروة=لازم يصون المال هو واخوانه
مادام هذي هي فعايل جدودنا=كلن يحط الطايلة نيشانه
هذي يميني حطها بيمينك=رجل(ن) يشيد وصاحبه بوزانه
وش صار قبل شهور في نشرتنا=وبموجز الاخبار بان إعلانه
تباشرت كل البلاد بشوفه=وكلن يلد لدارنا بأعيانه
واليوم ماله حس ماله طاري=تكفون ياهل المجد ياتيجانه
تكفون لايفرح علينا حاسد=تكفون ياهل الحق ياميزانه
وتكفى يامير الجود راس الشيخة=ياعز نجد وهيبته سلطانه
سلمان لاكبرت بنجد(ن) قاله=الله يخلي لنجدنا سلمانه
حر(ن) شهر كلن يعرف وصوفه=وتشرّ به للكايدة جنحانه
سلمان تكفى مالها إلا نادر=يالول فعل الطيب يامرجانه
واليوم يوم الشعر مهوب أمسه=أطلقت من جزل القصيد عنانه
نوادر(ن) ماسقتها لسواكم=يامستقر الطيب ياعنوانه
والتاجر اللي مايجيب الغالي=قوموا عليه وسكروا دكانه!